Мы ў вас укралі мільярд, бо нашто ён вам? 38

Прыкладна з такой заявай выступіла кіраўніца найбуйнейшага лукашэнкаўскага банка.

«Ну вось у мяне яго [даляра] няма, і я не іду ў абменнік, мне ён проста не патрэбны, у мяне ў 90-я не было, і сёння няма, — заявіла па тэлебачанні Надзея Ермакова, старшыня праўлення „Беларусбанка“ — найбуйнейшага дзяржаўнага банка краіны. — Так, абутак завозіцца імпартны, так, ён стане крыху даражэйшы, але нічога страшнага, зносім замест двух туфляў адны».

Якія ж народныя яны, беларускія банкіры. Туфлі даношваюць імпартныя…

Эканамісты падлічылі, што ў выніку дэвальвацыі ўкладчыкі страцілі каля 1,5 мільярда даляраў за кошт абясцэньвання сваіх дэпазітаў. І гэтыя паўтара мільярда не зніклі ў нікуды, бо ў нікуды нічога ніколі не знікае. Яны вытрачаныя. Імі напампоўвалася эканоміка, каб стварыць бурбалку "беларускага эканамічнага цуду". Яны вытрачаныя на выбары, на Усебеларускі народны сход, у прэзідыуме якога сядзела і мадам Ермакова (у мінулым загадчыца фінаддзела Шклоўскага райвыканкама, што ажыццявіла палёт па маршруце Шклоў — «брыльянтавы квартал» беларускай сталіцы).

Надрукавалі рублёў… І гэты сцэнар — раскулачванне насельніцтва праз інфляцыю і дэвальвацыю — паўтараецца каторы раз.

«На дурака не нужен нож», — як спявалі Ліса Аліса і кот Базіліа.

Мікола Бугай

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ