У нядзелю, 3 лістапада, у Мінску прайшло традыцыйнае шэсце і мітынг у Курапатах памяці продкаў, загінулых падчас бальшавіцкага тэрору. У ім удзельнічалі каля 500 чалавек.
Чакайце неўзабаве на nn.by выніковыя фота- і відэарэпартажы карэспандэнтаў «НН».
14:50
Па чарзе выступілі Юры Папкоў і Алесь Чахольскі. Удзельнікі шэсця праспявалі «Магутны Божа». Мітынг каля мемарыяльнага каменя на гэтым скончыўся.
Удзельнікі шэсця ўстлёўваюць прынесеныя з сабой ва ўрочышча крыжы.
14:30
У Курапатах адбываецца мітынг каля мемарыяльнага каменя. Адказны сакратар КХП-БНФ Валеры Буйвал чытае зварот лідара партыі Зянона Пазняка.
14:12
Удзельнікі шэсця набліжаюцца да Курапатаў. Жалобны мітынг пачнецца ў 14:30.
14:05
Шэсце набліжаецца да МКАД.
У часе руху калоны ўдзельнікаў шэсця ў Курапаты адбыўся інцыдэнт, паведамляе БелаПАН. Калі калона праходзіла па вуліцы Карбышава, некалькі нецвярозых маладых людзей пачалі гучна абражаць удзельнікаў акцыі, выказваць сваю нязгоду з апазіцыяй.
Пры гэтым яны крычалі, што «браты-славяне павінны быць разам з Украінай, Расіяй і Югаславіяй». Некалькі сталых удзельнікаў шэсця ўступілі ў дыскусію з маладымі людзьмі. Інцыдэнт завяршыўся без наступстваў праз некалькі хвілін.
У той жа час шматлікія мінакі выказваюць салідарнасць з удзельнікамі акцыі, дзякуюць за тое, што тыя адзначаюць памятную дату, аўтамабілі, што едуць міма, сігналяць, адзначае карэспандэнт агенцтва.
13:50
Удзельнікі шэсця мінулі Лагойскі тракт. Цяпер калона ідзе па вуліцы Мірашнічэнкі.
13:30
Актывісты КХП-БНФ нагадалі пра юбілей Фронту расцяжкай «25 гадоў Беларускаму народнаму фронту — 19.10.1988—19.10.2013»
13:05
Дэманстранты ідуць па вуліцы Карбышава. Моладзь нясе чорную расцяжку з надпісам «Малады фронт», дэманструючы яе кіроўцам аўто, што едуць побач.
12:30
Шэсце праходзіць па вуліцы Каліноўскага паўз царкву Усіх Святых.
12:00
Калона набліжаецца да будынка Нацыянальнай бібліятэкі.
11:45
Удзельнікі шэсця нясуць з сабой новыя крыжы. Некаторыя кіроўцы вітаюць калону дэманстрантаў сігналамі аўто.
11:25
Шэсце рушыла ў бок Курапатаў. У ім прымаюць удзел некалькі сотняў чалавек. Людзі нясуць дзясяткі сцягоў і транспаранты. Дэманстранты спяваюць «Пагоню».
11:05
Ад арганізатараў на месцы збору прысутнічюць намеснік старшыні КХП-БНФ Юры Беленькі і сакратар партыі Валеры Буйвал.
Сярод удзельнікаў шэсця заўважаныя лідары Партыі БНФ Аляксей Янукевіч і Рыгор Кастусёў, адзін з сустаршыняў «Маладога фронту» Зміцер Дашкевіч.
***
10:50
На месцы збору каля сотні чалавек.
Удзельнікі шэсця трымаюць бел-чырвона-белыя сцягі, партыйную сімволіку, вядомыя па мінулым акцыям транспаранты і расцяжкі.
***
Шэсце, заяўнікам якога выступае Кансерватыўна-хрысьціянскай партыя — БНФ, дазволена ўладамі.
Збор удзельнікаў а 10:30 каля Гадзіннікавага завода (ст. метро «Парк Чалюскінцаў»). З 11:00 да 14:30 — шэсце.
Удзельнікі пройдуць па традыцыйным маршруце ад мінскага парку Чалюскінцаў праспектам Незалежнасці, вуліцамі Каліноўскага, Сядых, Карбышава, Гамарніка і Мірашнічэнкі. Людзі будуць несці бел-чырвона-белыя сцягі і крыжы, якія ўсталююць у Курапатах, а таксама свечкі і кветкі.
Ад 30 кастрычніка 1988 года [першы раз адзначэнне было ў 1987 г.] традыцыйны дзень памінання нябожчыкаў — Дзяды — набыў характар грамадска-палітычнай падзеі.
У мінулы панядзелак гісторык Ігар Кузняцоў назваў колькасць рэпрэсаваных сталіністамі ў Беларусі ў 1930-1940-я гады. Рэпрэсавана было ад 1,4 да 1,625 млн чалавек (у пачатку 1990-х гучала лічба - 600 тыс.),
расстраляна было не менш за 377 тыс. Большая іх частка знішчаныя ў Мінску і ваколіцах.
