Яго абвінавацілі па арт. 370 Крымінальнага кодэкса (здзек з дзяржаўных сімвалаў) за тое, што запосціў «УКантакте» малюнак дзяржаўнага сцяга на фоне свастыкі. Справу разглядала суддзя Алеся Серадзенка, паведамляе «Вясна».
Згодна з версіяй абвінавачвання, Дзмітрый Панцялейка ў кастрычніку 2021 года з дапамогай ноўтбука размясціў у двух акаўнтах «ВКонтакте» малюнак дзяржаўнага сцяга Рэспублікі Беларусь, на фоне якога была размешчана свастыка. Гэтыя дзеянні кваліфікавалі як здзек з дзяржаўных сімвалаў.
Дзяржабвінавачванне запрасіла для Панцялейкі пакаранне ў выглядзе пазбаўлення волі на тэрмін адзін год з адбываннем у папраўчай калоніі ва ўмовах агульнага рэжыму. Менавіта такое пакаранне і прызначыла суддзя Серадзенка. Таксама ў Дзмітрыя канфіскавалі ноўтбук Asus як сродак здзяйснення злачынства.
