Ваенны эксперт Алег Жданаў. Скрын відэа
— Хацеў бы з вамі абмеркаваць даныя амерыканскага Інстытута па вывучэнні вайны, які кажа, што Расія будзе наступаць па трох кірунках. Першы — з Ізюма, другі — з Рубежнага і Севераданецка, трэці — баі ў Папаснай і Краматорску. Як вы лічыце, які сцэнарый увогуле магчымы?
— Я думаю, што асноўным сцэнарыем гэтага наступу будуць два напрамкі — гэта ад Ізюма на Краматорск і ад Гуляйполя на Краматорск. Гэта адзіны спосаб, каб акружыць нашу групоўку войскаў у зоне Аперацыі аб'яднаных сіл. І, хутчэй за ўсё, гэта будзе асноўны сцэнарый для Узброеных сіл Расійскай Федэрацыі.
— Як вам здаецца, мінімальная мэта Крамля — гэта захоп тэрыторыі Данецкай і Луганскай абласцей, якія кантралюе Кіеў?
— Не, яны наўрад ці на гэта разлічваюць. Хутчэй за ўсё, яны пастараюцца акружыць нашу групоўку ў зоне Аперацыі аб'яднаных сіл. І тады яны могуць вылучыць ультыматум — дапусцім, выпуск групоўкі з аблогі ў абмен на тэрыторыі Данецкай і Луганскай абласцей у адміністрацыйных межах.
— Гэта значыць, яны хочуць узяць ўкраінскія сілы ў кола?
— Абсалютна правільна. Яны хочуць закальцаваць нашы войскі ў зоне аперацыі. Краматорск — гэта горад, на якім яны хочуць замкнуць кола. [Яны хочуць закальцаваць] усё, што будзе на ўсход ад Краматорска, — а гэта менавіта лінія размежавання па «Мінску-2», дзе мы да гэтага часу ўпэўнена трымаем абарону.
— Заходнія спецслужбы лічаць, што прасоўванне расійскіх сіл ускладняе «спецыфічная мясцовасць» на поўдні і на ўсходзе краіны. Можаце растлумачыць, што ў ёй асаблівага?
— Справа ў тым, што гэта данецкія стэпы. Там вельмі вялікія абшары, адкрытыя абшары. І там цяжкае прасоўванне ў выпадку пагаршэння надвор'я. Гэта значыць, калі ідуць дажджы, стэп ператвараецца ў практычна непраходную мясцовасць.
А вялікія адлегласці і роўная адкрытая мясцовасць патрабуюць вялікай колькасці войскаў. Не атрымаецца так, як на поўначы Украіны, дзе яны па прасеках ішлі калонамі і разгортвалі баявы парадак толькі пры неабходнасці.
— Міністэрства замежных спраў Чэхіі апублікавала ноту пратэсту, якая была ім атрыманая ад расійскіх дыпламатаў. У ёй гаворыцца, што Чэхія нібыта не можа даваць трэцім краінам зброю савецкага паходжання без згоды на гэта Расіі. А што, сапраўды ёсць нейкія патрабаванні ў дачыненні да ўжо прададзенай зброі?
— Краіна-вытворца мае права вета на перапродаж зброі трэцяму боку і на мадэрнізацыю гэтай зброі. Гэта значыць, і мадэрнізацыю, і продаж узбраення трэцяму боку трэба ўзгадняць з вытворцам.
Але ў гэтым выпадку з Расіяй міжнароднае права згуляла злы жарт. Справа ў тым, што вытворца гэтага ўзбраення — Савецкі Саюз, і гэтая краіна ўжо не існуе. І нават нягледзячы на тое, што Расія аб'явіла сябе правапераемніцай СССР, гэта не накладвае абавязацельстваў на краіны, якія валодаюць савецкім узбраеннем, узгадняць яго продаж з Расійскай Федэрацыяй.
— Як вам здаецца, калі ў Марыупалі пачнецца тая самая «актыўная фаза», якой пагражае Міністэрства абароны Расіі?
— Гэтая актыўная фаза вайны там ніколі не спынялася — ні на адзін дзень. Цяпер, наадварот, ёсць інфармацыя, што Расійская Федэрацыя зняла частку войскаў з Марыупаля і перакідвае іх на паўднёвы кірунак для ўзмацнення наступальнай групоўкі ад Гуляйполя. Сітуацыя ў Краматорску застаецца прыкладна аднолькавай. І націск расійскіх войскаў толькі цяпер крыху аслабеў. Але ў асноўным яны імкнуцца трымаць націск увесь час.
— Як вам здаецца, Расіі ёсць чым прыкрывацца з мора ў Марыупалі, улічваючы, што крэйсер «Масква» затоплены?
— З мора — не. На сённяшні дзень эскадра Чарнаморскага флота голая і практычна адкрытая з паветра. І дзейнічаць яна цяпер можа толькі на вялікай адлегласці, таму што асноўны парасон СПА ствараў над эскадрай менавіта крэйсер «Масква».
