«Беларуськалій». Склад гатовай прадукцыі. Фота: kali.by
Фінансавыя санкцыі і іншыя абмежаванні, уведзеныя ў дачыненні да Беларусі і Расіі, прывялі да зніжэння экспарту калійных угнаенняў з гэтага рэгіёна на 20 працэнтаў у параўнанні з тым жа перыядам мінулага года. У звычайны час вытворчасць і пастаўкі ўгнаенняў з гэтых дзвюх краін складаюць 40% ад сусветнага рынку, гаворыцца ў квартальнай справаздачы кампаніі Nutrien.
Зніжэнне долі калійных кампаній з Беларусі і Расіі на сусветным рынку дазволіла Nutrien у разы павялічыць выручку і прыбытак.
У Беларусі статыстыку па экспарце калію закрылі летась пасля таго, як галіна патрапіла пад заходнія санкцыі. У мінулым годзе ЕС увёў забарону на пастаўкі і транзіт часткі прадукцыі «Беларуськалія», ЗША ўвялі санкцыі супраць самой кампаніі і БКК — афіцыйнага экспарцёра прадукцыі. Да абмежавальных мер далучыліся Канада, Вялікабрытанія.
На пачатку гэтага года Літоўская чыгунка спыніла транспарціроўку калійных угнаенняў з Беларусі для паставак у трэція краіны. Пазней спынілася іх транспарціроўка да ўкраінскіх марскіх партоў.
Сёння стала вядома, што ў шосты пакет санкцый ЕС могуць патрапіць «Беларуськалій» і яго экспартная кампанія БКК.