У літоўскім горадзе Шадува прайшла святочная выстава «Авечка апране і накорміць 2022». Каб завабіць на яе людзей, жывёл расфарбавалі, а для дзяцей ладзілі заняткі, на якіх яны малявалі на поўсці авечак. У сацсетках людзі пачалі пытаць, ці не шкодна гэта і наколькі такія дзеянні наогул законныя.
Як растлумачылі выданню Delfi ў літоўскай ветэрынарнай службе, якая звязалася з арганізатарамі, для афарбоўкі авечак выкарыстоўвалася спецыяльная фарба, а за дзецьмі прыглядалі дарослыя. Законы ЕС забараняюць любыя пазнакі на жывёлах толькі тады, калі для гэтага выкарыстоўваецца шкодная фарба.
