Рэцэпт на выхадныя. Булачкі з карыцай

Рэцэпт на выхадныя. Булачкі з карыцай — духмяная выпечка 6

Шведы ведаюць, як атрымліваць асалоду ад жыцця, і іх любімыя булачкі — з карыцай. У гэтым простым рэцэпце цукар з карыцай знаходзіцца ўверсе, а не схаваны недзе ўнутры. Не саромейцеся ж і паспрабуйце спячы самі!

Фота: BBC Food

Каб згатаваць булачкі з карыцай, вам спатрэбіцца:

175 грамаў масла
200 мілілітраў малака
1 чайная лыжка солі
250 грамаў мукі грубага памолу ці цэльназерневай + яшчэ трохі для пасыпання
250 грамаў моцнай белай мукі (з павышанай колькасцю клейкавіны — 12—13%)
паўтары чайныя лыжкі хуткадзейных дражджэй
1 чайная лыжка молатага кардамону (калі хочаце)
4 сталовыя лыжкі цукру + 100 грамаў цукру для пасыпання
3 яйкі
аліўкавы алей для змазвання
2 сталовыя лыжкі карыцы

Вы можаце замяніць абодва віды мукі звычайнай пшанічнай мукой.

У маленькай каструлі награвайце 100 грамаў масла, малако і соль, пакуль масла не растане. Трохі астудзіце сумесь, пакуль яна не стане цёплай.
У вялікай місцы змяшайце да аднароднасці муку, дрожджы, кардамон і 4 сталовыя лыжкі цукру. Зрабіце ў цэнтры сумесі паглыбленне і разбіце туды 2 яйкі. Уліце цёплую малочную сумесь і перамяшайце ўсё, каб атрымалася ліпкае цеста.
Змажце працоўную паверхню чайнай лыжкай аліўкавага алею. Выкладзіце цеста на змазаную паверхню і энергічна вымешвайце на працягу 5—8 хвілін (магчыма, вам можа спатрэбіцца пластыкавы скрабок, каб аддзяліць цеста ад працоўнай паверхні). Не дадавайце мукі, бо гэта зробіць булачкі больш сухімі і цвёрдымі. Працягвайце мясіць, пакуль цеста не стане менш ліпкім і больш гладкім і эластычным, потым сфармуйце з цеста шар і пакладзіце яго ў вялікую і змазаную алеем міску. Накрыйце міску чыстым кухонным ручніком і пастаўце яе ў цёплае месца на гадзіну або пакуль аб’ём цеста не павялічыцца ўдвая.
Тым часам згатуйце начынку для булачак. Размякчыце 75 грамаў масла, змяшайце яго ў місцы з 50 грамамі цукру і 1 сталовай лыжкай карыцы. Перамешвайце масла, цукар і карыцу з дапамогай відэльца, пакуль у вас не атрымаецца аднародная маса. Змяшайце 50 грамаў цукру і 1 сталовую лыжку карыцы, што ў вас засталіся, у іншай місцы і адстаўце ўбок.
Калі цеста паднімецца, выкладзіце яго на пасыпаную мукой працоўную паверхню і акуратна раскачайце ў прамавугольнік памерам 36 на 24 сантыметры. Раўнамерна размяркуйце па цесце сумесь масла, карыцы і цукру.
Згарніце цеста ў рулет (пачынайце ад бліжэйшага да вас доўгага краю). Нарэжце гэты рулет на 12 роўных кавалкаў.
Пакладзіце кожны кавалак на раскрытую папяровую форму для кексаў або ў змазаную алеем металічную форму для кексаў (апошні варыянт зробіць вашы булачкі больш высокімі і выпуклымі). Накрыйце чыстым кухонным ручніком і адстаўце ўбок на 30—45 хвілін, ці пакуль булачкі не паднімуцца.
Разагрэйце духоўку да 200 градусаў.
Змажце верх булачак узбітым яйкам і шчодра пасыпце цукрам з карыцай. Выпякайце 12 хвілін, пакуль булачкі не стануць цёмна-залацістымі і крыху карычневымі. Булачкі асабліва смачныя, калі цёплыя.