Фота: pxhere.com
За два гады корм для сабакі падаражэў на 100 рублёў
Ганна ўзяла сабаку 5-месячным шчанюком, які да таго часу быў прывучаны да корму прэміум-класа Hillʼs. У пачатку 2020 года 14-кілаграмовая ўпакоўка такога корму каштавала 131 рубель.
— Вялікай пачкі хапае месяца на два-тры.
Калі сабака падрос, гаспадыня перавяла яго на ProPlan амерыканскага брэнда Purina. За год-паўтара пачак корму вагой 14 кг падаражэў са 126 да 152 рублёў.
Таму дзяўчына па фінансавых прычынах вымушана была перавесці гадаванца на больш танны корм Dog Chow гэтага ж вытворцы. Яго пачак абыходзіўся амаль удвая танней — 70—80 рублёў. Нядаўна Ганна выклала за гэты ж корм 127 рублёў і кажа, што брала яго са зніжкай.
— Цяпер Dog Chow практычна знік з прылаўкаў — можна знайсці толькі ў адзінкавых крамах. Пакуль яшчэ ёсць ProPlan, як расійскай, так і еўрапейскай вытворчасці, але без зніжак і акцый ён каштуе каля 220 рублёў, што на 100 рублёў больш, чым у 2020 годзе. Так што мы да яго сапраўды не вернемся ў хуткім часе.
Каб вызначыцца, чым карміць сабаку, Ганна пракансультавалася ў зоамагазіне — удакладняла, якія кармы ёсць у наяўнасці і з вялікай доляй верагоднасці будуць пастаўляцца ў блізкім часе.
— Параілі італьянскі корм на вагу па 7 рублёў за кілаграм. Узяла на спробу з такім разлікам, каб нам хапіла да канца года. Далей буду глядзець, што ёсць у продажы і колькі каштуе. Планую закупляцца загадзя, каб хапіла надоўга.
Па словах Ганны, менавіта так зрабілі яе знаёмыя сабачнікі, у якіх гадаванцы маюць праблемы са здароўем і сілкуюцца спецыялізаваным кормам.
— Яны яшчэ вясной закупаліся вялікімі ўпакоўкамі і не пралічыліся, бо корм або знік з продажу, або значна падаражэў. У мяне, на жаль, у той момант не было свабодных сродкаў на такую закупку.
Ганна кажа, што рэзкая змена корму не ідзе сабакам на карысць. Пераход павінен быць плаўным, з падмешваннем новага прадукту да старога, каб не ўзнікла парушэнняў у страваванні. Інакш да праблемы пошуку корму дадасца неабходнасць аплачваць ветэрынарныя паслугі.
Звыклыя кармы зніклі з продажу — перавяла ката на «чалавечую» ежу
У Святланы ўжо трэці год жыве кот пароды скоціш-фолд, ад якога адмовіліся папярэднія гаспадары. Жывёла ва ўзросце, яму прыкладна 14 гадоў. У ежы непатрабавальны, таму да нядаўняга часу ў яго рацыёне былі не толькі вільготны корм Felix і Whiskas, але і недарагі сухі корм One ад Purina.
Прыкладна год таму гадаванец Святланы перанёс сурʼёзнае віруснае захворванне, пасля якога ў яго пачалі сыходзіць крывёй дзясны, а потым выпала частка зубоў. Ад сухога корму One прыйшлося адмовіцца, паўстала пытанне аб яго замене.
— Ветэрынар параіла не занадта жорсткі сухі корм Pro Plan Dental Plus, які ўдалося знайсці толькі ў адным зоамагазіне. Першы раз яго купляла за 23 рублі (пачак 1,5 кг), другі раз аддала 34 рублі за ўпакоўку, — кажа гаспадыня ката.
Яе гадаванец есць сухі корм з цяжкасцю і не заўсёды, пачкі хапае прыкладна на два месяцы. Таму Святлана купіла яму на спробу вільготнага корму Royal Canin Instinctive, разлічанага на жывёл з адчувальнымі дзяснамі.
— Адзін пакуначак (85 г) каштуе 2 рублі, але гэта той рэдкі выпадак, калі кот нават не дакрануўся да ежы.
Затое яму спадабаліся кансервы Schesir, за адзін слоічак на 85 грамаў гаспадыня яшчэ некалькі месяцаў таму выкладвала па 3,5 рубля.
— Цяпер гэты корм складана знайсці ў продажы. А тыя крамы, у якіх яшчэ засталіся кансервы, выставілі цэннікі ў раёне 8—10 рублёў за слоічак. Што да звыклых Felix і Whiskas, то яны час ад часу таксама знікаюць з крам. І цана вырасла: раней пакуначак такога корму можна было купіць за 60—70 капеек, цяпер ён каштуе рубель і вышэй, калі не на акцыі.
У выніку Святлана стала дадаваць у рацыён гадаванца папярэдне здробненае сырое ці адварное курынае філе, вараную рыбу і свіны фарш. Кажа, што кілаграм «чалавечай» ежы абыходзіцца таксама нятанна, прыкладна ў 12—15 рублёў.
— Буйнога курынага філе кату, які важыць 6 кг і не пакутуе ад адсутнасці апетыту, хапае на адзін дзень. Каштуе такі кавалачак прыкладна 3—4 рублі.
Таксама Святлана кажа, што з зоамагазінаў і ветэрынарных аптэк зніклі танныя антыгістамінныя прэпараты і кроплі ад блох. Звычайна для свайго ката яна купляла прэпарат «Ірбіс», які змяшчае ў сабе натуральныя інсектыцыды, яго гадаванец пераносіў вельмі добра.
— Аддавала за адзін флакон сродку нешта каля 2,5—3 рублёў, цяпер яго цяжка знайсці ў продажы. Бачыла ў адной анлайн-аптэцы пакаванне з 5 флаконаў за 21 рубель, але мне гэтулькі не трэба.
У блізкіх ад дома аптэках Святлане прапанавалі больш дарагія сродкі ад блох, у выніку яна купіла за 8 рублёў прэпарат «Барс».
«Замену зніклым кармам заўсёды можна знайсці»: меркаванне пастаўшчыкоў
Пастаўшчыкі прадукцыі такіх хадавых брэндаў, як Whiskas, Kitekat, Friskes прызнаюцца, што
расійскія прадпрыемствы, дзе вырабляюцца кармы, маюць праблемы з сыравінай з-за санкцый, таму вытворчасць прадукцыі істотна скарацілася.
— Цэны, адпаведна, папаўзлі ўверх, і сёння многія беларускія імпарцёры проста адмаўляюцца везці сюды прадукцыю, на ёй цяпер складана зарабіць, — распавёў прадстаўнік адной з беларускіх кампаній-пастаўшчыкоў.
Паводле яго, з амерыканскімі і еўрапейскімі кармамі праблемы ўзніклі па іншай прычыне: з-за ўвядзення санкцый адбыліся сурʼёзныя збоі ў лагістыцы.
— Тыя кампаніі, якія вырашылі пытанне з транспарціроўкай кармоў, закладваюць у іх цану выдаткі на дастаўку акружным шляхам. Таму цэны ў розніцу, нягледзячы на абмежаванне гандлёвай надбаўкі, таксама растуць.
Прадстаўнік яшчэ аднаго буйнога імпарцёра кармоў для жывёл расказаў, што прадукцыя некаторых брэндаў у Беларусь зараз сапраўды не пастаўляецца. Але ёсць шмат альтэрнатыўных вытворцаў, з якімі кампанія ўжо пачала працаваць.
— У нас на падыходзе з-за мяжы 25 фул-трэкаў з кормам розных марак, так што ўладальнікам гадаванцаў няма пра што турбавацца.
Па словах намесніка дырэктара «Альпака-Бел» Сяргея Лукашэвіча, у кампаніі ўвесну былі сурʼёзныя праблемы з лагістыкай, якія ўдалося вырашыць. Таму супраца з еўрапейскімі вытворцамі працягваецца.
— Нядаўна былі ў Іспаніі, размаўлялі з прадстаўнікамі кампаніі Affinity — вытворцы кармоў вядомага брэнда Advance. Яны настроены на сумесную працу з Беларуссю.
Корм прэміум-класа Advance, па словах Сяргея Лукашэвіча, яшчэ год таму знаходзіўся ў верхнім цанавым сегменце і быў даступны далёка не ўсім пакупнікам.
— Цяпер ён каштуе прыкладна столькі ж, колькі прадукцыя расійскіх вытворцаў, і пры гэтым ёсць у большасці зоамагазінаў. Так што замену зніклым з продажу кармам заўсёды можна знайсці.
«Без кармоў не застанемся, пытанне толькі ў цане»: меркаванне ветэрынараў
Тое, што хатнія жывёлы без кармоў не застануцца, у ветдактароў не выклікае сумнення. Пытанне — у цане і якасці. Уладальніца клінікі «СимбаВет» Юлія Ашэйчык адзначае, што істотна падаражэлі спецыялізаваныя кармы для гадаванцаў, у якіх ёсць праблемы са здароўем. А вось цана звычайных кансерваў і сухіх прадуктаў вырасла ненашмат.
— Так, зніклі некаторыя віды кармоў, але ў Беларусі ўсё яшчэ даступная прадукцыя такіх брэндаў, як Royal Canin і Purina. Плюс шмат прадукцыі расійскіх вытворцаў нармальнай якасці. Так што знайсці замену нескладана.
Праўда, спецыяліст папярэджвае, што падбор корму для гадаванцаў — пытанне, якое вырашаецца індывідуальна. І калі котка ці сабака дрэнна засвойваюць новыя кансервы ці мясныя падушачкі, адмаўляюцца ад ежы, варта пракансультавацца з ветэрынарным лекарам у пытаннях харчавання гадаванца.
![Клас Клас](https://dcsfxzu8xls6u.cloudfront.net/images/reactions/reaction-like.png)
![Панылы сорам Панылы сорам](https://dcsfxzu8xls6u.cloudfront.net/images/reactions/reaction-facepalm.png)
![Ха-ха Ха-ха](https://dcsfxzu8xls6u.cloudfront.net/images/reactions/reaction-smile.png)
![Ого Ого](https://dcsfxzu8xls6u.cloudfront.net/images/reactions/reaction-omg.png)
![Сумна Сумна](https://dcsfxzu8xls6u.cloudfront.net/images/reactions/reaction-sad.png)
![Абуральна Абуральна](https://dcsfxzu8xls6u.cloudfront.net/images/reactions/reaction-anger.png)