Праваабаронцы «Вясны» паведамляюць, што сям'ю абвінавацілі па ч. 1 арт. 342 Крымінальнага кодэкса.
Судовы працэс вяла суддзя Цэнтральнага раёна горада Мінска Вікторыя Шабуня.
Сяргей Кудрыцкі, які працаваў спецыялістам па продажах, быў затрыманы 24 чэрвеня 2022 года і змешчаны да суда пад варту, а вядучую спецыялістку аднаго з аддзелаў МТБанка Маргарыту адпусцілі пад вялікі заклад, бо на ўтрыманні сям’і знаходзіцца непаўналетняе дзіця.
Па матэрыялах абвінавачання, Сяргей і Маргарыта 30 жніўня 2020 года прынялі актыўны ўдзел у несанкцыянаваным масавым мерапрыемстве ў Мінску. Яны выйшлі з бел-чырвона-белым сцягам і плакатам з тэкстам: «С…, выходзь ОТХЭППИБЕЗДИМ».
6 верасня, згодна з матэрыяламі абвінавачвання, Кудрыцкія прынялі ўдзел у акцыі паблізу стэлы.
У судовым пасяджэнні Сяргей Кудрыцкі віну прызнаў. Суду паказаў, што 30 жніўня 2020 года быў сярод натоўпу пратэстоўцаў са сваёй жонкай Маргарытай.
Аднак у судзе стала вядома, што Сяргея затрымлівалі яшчэ і 9 чэрвеня 2020 года. Тады ў яго рэчах знайшлі нібыта пакецік з марыхуанай. Так у следства з’явіўся яшчэ адзін артыкул — 328, абвінавачанне па якім разглядалася адначасова.
Суд Цэнтральнага раёна Мінска 19 верасня пастанавіў: на падставе ч. 1 арт. 342 Крымінальнага кодэкса прызначыць яму пакаранне ў выглядзе абмежавання волі на тры гады без накіравання ў выпраўленчую ўстанову адкрытага тыпу. А паводле ч. 1 арт. 328 прызнаць вінаватым у незаконных без мэты збыту набыцці і захоўванні наркатычных сродкаў, і прызначыць яму пакаранне ў выглядзе пазбаўлення волі на два гады. Па сукупнасці злачынстваў канчаткова прызначыць Сяргею пазбаўленне волі на два гады з утрыманнем у калоніі агульнага рэжыму.
Маргарыце суд прызначыў абмежаванне волі на тры гады без накіравання ў папраўчую ўстанову адкрытага тыпу («хатняя хімія»).
