Фота: White Helmets
Гэтая лічба не канчатковая і працягне расці збольшага таму, што пад заваламі яшчэ застаюцца людзі. Ва ўмовах зімовых халадоў магчымасцяў дастаць іх адтуль жывымі ўсё менш.
Першы землятрус магнітудай 7,8 адбыўся недалёка ад Газіянтэпа на паўднёвым усходзе Турцыі ў ноч на панядзелак. Праз некалькі гадзін за гэтым быў новы падземны штуршок магнітудай 7,5.
У Сірыі бедства пагаршаецца шматгадовай грамадзянскай вайной: многія будынкі ўжо былі пашкоджаныя і ад землятрусу абрынуліся; доступ ратавальнікаў і гуманітарнай дапамогі ў многія раёны абцяжараны.
На поўдні Турцыі таксама жыве мноства бежанцаў з Сірыі, часта ў спехам збудаваных або старых будынках. «Адна катастрофа наклалася на іншую, — сказала ў інтэрв'ю Бі-бі-сі брытанскі выканаўчы дырэктар «Дактароў без межаў» Наталі Робертс, — у гэтай частцы Турцыі, у такіх месцах, як Газіянтэп, мільёны сірыйскіх бежанцаў, і яны часта жывуць у не вельмі трывалым жыллі. Гэта рэцэпт бяды».
Прафесар Люсі Істхоўп, эксперт у галіне ліквідацыі наступстваў стыхійных бедстваў, у інтэрв'ю Бі-бі-сі параіла людзям, якія жадаюць дапамагчы пацярпелым, дасылаць не рэчы, а грошы.
«Самая важная і карысная рэч у гэты момант — гэта грошы. Ёсць няўрадавыя, дабрачынныя, урадавыя арганізацыі, якія ўсімі сіламі імкнуцца дапамагчы. Што ім трэба не толькі цяпер, але і на гады наперад — гэта грошы», — кажа яна. Збіраць жа, напрыклад, цёплыя рэчы, знаходзячыся ў далёкай ад Турцыі ці Сірыі краіне, хутчэй за ўсё, бескарысна.
Улічваючы палітычную сітуацыю ў Сірыі, былы каардынатар ААН па гуманітарнай дапамозе Ян Эгеланд у інтэрв'ю Бі-бі-сі параіў ні ў якім выпадку не пераводзіць грошы бакам палітычнага канфлікту ў Сірыі — ні рэжыму Асада, ні апазіцыі.
«Уся дапамога павінна ісці праз няўрадавыя арганізацыі — агенцтва ААН, сістэму Чырвонага Крыжа і Чырвонага Паўмесяца», — сказаў ён.
