«Збіраюць будынкавы сок». Што за інсталяцыя вакол Мастацкага музея? У сацыяльных сетках шквал здагадак, мы даведаліся прызначэнне 4

Таямнічыя бутлі на вуліцы Кірава ў Мінску. Фота: сацыяльныя сеткі

Фота з бутлямі вады ў металічных канструкцыях па вуліцы Кірава разляцелася ў сеціве і не засталося без увагі каментатараў.

«Збіраюць будынкавы сок», «супермадэрновыя вогнегаснікі дзеля вонкавага размяшчэння», «будуць туды кветкі саджаць, а пакуль ваду «пасадзілі», «для недакуркаў» — жартавалі каментатары.

Прызначэнне такіх канструкцый, як выявілася, было празаічна жыццёвым.

Той будынак па вуліцы Кірава, 27. Скрыншот: «Яндэкс-панарама»

Незвычайныя канструкцыі прыдумалі дворнікі Нацыянальнага мастацкага музея, каб засцерагчы пешаходаў і машыны ад наледзі і ледзяшоў, якія могуць падаць з даху. Між бутлямі нацягвалі стужку, якою адмяжоўвалі небяспечную зону. Самі бутлі ставілі ў якасці баласту, каб металічныя канструкцыі не знесла ветрам.

Канструкцыі прыбяруць увесну, калі будзе ўпэўненасць, што пагрозы снегападаў больш няма.

Дах у будынка стары, чысціць яго складана, вось і прыдумалі ход з бутлямі.

Будынак Нацыянальнага мастацкага музея на вуліцы Кірава збіраюцца рамантаваць. Цяпер у ім базуюцца рэстаўратары, таксама там размешчана фондасховішча і навуковая бібліятэка. Будынак мусіць стаць часткай музейнага квартала, які ахопіць і суседнія будынкі. Пра музейны квартал гаворыцца ўжо даўно, але канкрэтных тэрмінаў, калі ён з'явіцца, не называюць. 

Мастацкі музей выклаў відэаэкскурсію і 3D-тур па выставе да 100-годдзя музея Луцкевіча

У Нацыянальным мастацкім музеі «ажывілі» карціны Бялыніцкага-Бірулі

Супрацоўнікаў Нацыянальнага мастацкага музея звольнілі за фотакартку салідарнасці 2020 года

Nashaniva.com

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ