У заяве Мюрыэл Боўзэр падкрэсліваецца, што святкаванне Дня Волі «спрыяе прасоўванню і захаванню багатай гісторыі, мовы і культуры беларусаў у Вашынгтоне, акрузе Калумбія і ва ўсёй беларускай дыяспары», а веданне беларускіх традыцый і звычаяў «умацоўвае сацыяльную структуру нашай шырокай супольнасці і робіць значны ўнёсак у жыццяздольнасць і сацыяльную разнастайнасць акругі Калумбія».
«Падтрымка незалежнасці, дэмакратыі і свабоды ў Беларусі адпавядае нашым каштоўнасцям абароны правоў чалавека, дэмакратычнага самакіравання і захавання права на самавызначэнне», — падкрэслівае Боўзэр.
Мэр Вашынгтона ўжо другі год запар абвяшчае 25 сакавіка Днём Волі Беларусі, першы раз Дзень Волі ў Вашынгтоне святкавалі ў 2022 годзе.
Дэмакратычная лідарка Беларусі Святлана Ціханоўская 21—28 сакавіка здзейсніць візіт у ЗША і возьме ўдзел у мітынгу ў Вашынгтоне, прысвечаным Дню Волі.
