Баі за Бахмут ідуць ужо паўгода. Горад ператвораны ў руіны. Фота: 24-я мехбрыгада УСУ імя Караля Данілы
Расійскі вайсковец, сувязіст 4-й мотастралковай брыгады Узброеных сіл Расіі Андрэй Марозаў у сваім тэлеграм-канале заявіў, што 12 мая ўкраінская артылерыя накрыла штаб яго брыгады пад Бахмутам.
Забітыя камбрыг і начальнік штаба, а таксама афіцэр 2-га корпуса, у які ўваходзіць брыгада.
4-я брыгада вяла баі на поўнач ад Бахмута, замяніўшы там пашкамутаныя ўкраінцамі сілы ПВК «Вагнер».
Нагадаем, што 10—12 мая менавіта яе падраздзяленні былі выбітыя ўкраінцамі з шэрагу важных пазіцый і адкаціліся за Бярхоўскае вадасховішча на некалькі кіламетраў.
«У 4-й брыгадзе забітыя камбрыг і начштаба брыгады, загінуў афіцэр з упраўлення 2 АК, ёсць іншыя забітыя і параненыя афіцэры кіравання брыгадай, укропы [ўкраінцы] ўжо радасна пра гэта напісалі, так што гэта не навіна. Страты ў асабовым складзе ў батальёнах таксама ёсць», — напісаў Марозаў.
Пазней 14 мая гібель камандзіра 4-й брыгады палкоўніка Вячаслава Макарава і намесніка камандзіра армейскага корпуса па ваенна-палітычнай рабоце палкоўніка Яўгенія Броўкі пацвердзіла Міністэрства абароны Расіі. «Гераічна загінуў» — такую фармулёўку ўжыло расійскае ваеннае ведамства адносна Броўкі, тады як пра Макарава адзначана, што ён быў цяжка паранены і памёр пры эвакуацыі.
З іншых ваенных навін: сёння ўначы расійскія войскі нанеслі ўдары беспілотнікамі і крылатымі ракетамі. Над Кіевам усе беспілотнікі былі збітыя, затое некалькі крылатых ракет ударыла па аб'ектах у прыкарпацкім абласным цэнтры Цярнопаль. Паведамляецца пра разбурэнні і параненых. Учора аналагічныя ўдары былі нанесены па Хмяльніцкай вобласці ў цэнтры Украіны.
А інфармаванае расійскае выданне «Коммерсант» раскрыла некаторыя дэталі збіцця двух самалётаў і двух верталётаў над Бранскай вобласцю ўчора.
«Верталёты Мі-8, якія разбіліся ў Бранскай вобласці, і знішчальнікі Су-34 і Су-35 уваходзілі ў адну авіягрупу і маглі быць збітыя практычна адначасова», — паведамляе «Коммерсант».
Паводле інфармацыі выдання, знішчальнікі павінны былі нанесці ракетна-бомбавы ўдар па цэлях на тэрыторыі Чарнігаўскай вобласці Украіны, а верталёты — іх падстрахаваць, каб у тым ліку падабраць экіпажы знішчальнікаў, калі яны будуць збітыя агнём праціўніка. У выніку ўсе яны былі знішчаныя, іх экіпажы, усяго 9 чалавек, загінулі.
