Здымак ілюстрацыйны. Фота: агенцтва «Ваяр»
20-гадовага Віктара, які жыве ў невялікім горадзе Віцебскай вобласці, выклікаюць у ваенкамат ужо цяпер, хоць у 2021 годзе ён атрымаў статус непрыдатнасці да службы ў мірны час з пераабследаваннем кожныя тры гады. Тэрмін яго мінае восенню 2024-га, але з'явіцца загадалі ўжо цяпер.
Тлумачаць гэта тым, што ў лютым, маўляў, змянілі спіс хвароб, якія дазваляюць прызнаваць чалавека непрыдатным. Спачатку патэлефанавалі на пачатку мая і запыталіся, ці не хацеў бы ён да іх прыйсці, бо «чым раней адслужыш, тым лепш», а пасля адмовы хлопца ў сярэдзіне траўня яму зноў патэлефанавалі і сказалі тэрмінова прыйсці без права на адмову.
Позву Віктару не даслалі, а калі ён прыйшоў у ваенкамат, яе далі ўжо там. Цяпер ён праходзіць агляд: прайшоў некалькі лекараў у паліклініцы, а пасля сказалі легчы ў бальніцу, каб пацвердзіць дыягназ.
Падобная сітуацыя адбылася і з 21-гадовым Андрэем, які таксама жыве ў адным з раённых гарадоў Віцебскай вобласці. Ён павінен быў бы па графіку прыйсці на пераагляд увосень, але яму сказалі, што абавязкова трэба проста цяпер.
Па званку ён не пайшоў і на гэты нумар вырашыў не адказваць, але пасля гэтага Андрэю даслалі позву на месца працы. Пакуль не хадзіў, але і ўхіліцца магчымасці не бачыць. Прытым яго хвароба (праблема з сасудамі) усё адно нібыта не патрапіла пад карэкціроўку, таму ён не разумее, чаму яго так спешна трэба выклікаць.
Абодва суразмоўцы «Зеркала» расказалі, што ведаюць яшчэ некалькі падобных выпадкаў. Напрыклад, на пераагляд праз тэлефон выклікалі знаёмага Віктара. Малады чалавек з Мінска і таксама не прыдатны ў мірны час. У ваенкамат ён пакуль ісці не збіраецца — чакае позву. У Андрэя такіх знаёмых няма, але ён кажа, што гісторыі пра тэрміновы медагляд людзей, якія не прыдатныя ў мірны час, ён таксама чуў не раз.
Спробы даведацца пра гэта больш падрабязна ў ваенкаматах поспеху не мелі, там абышліся агульнымі словамі.
Чытайце таксама:
За 20 км ад мяжы з Украінай ў Беларусі будуюць умацаванні з «зубоў дракона» — «Беларускі Гаюн»
Лукашэнка назваў дэзынфармацыяй заявы аб украінскім контрнаступленні
Беларускі чыноўнік абверг расійскія страшылкі пра баявых украінскіх гусей і камароў
