Украінскія вайскоўцы. Фота: УСУ
У суботу расійскія ўлады паведамілі пра знішчэнне ўседарожніка «Ніва» расійскай арміі ў Бранскай вобласці. Два вайскоўцы загінулі. У вёсках Броўнічы і Сушаны, куды зайшла ўкраінская дыверсійная група, працягваецца бой.
«Ніва» Мінабароны Расіі пасля ўдару ўкраінскага дрона-камікадзэ. Скрыншот з мясцовых паблікаў
Адначасова сёння ўранку беспілотнікі атакавалі расійскія нафтаправоды ў Пскоўскай вобласці Расіі каля паўночнай мяжы Беларусі і ў Цвярской вобласці — за сотні кіламетраў ад мяжы Украіны.
Украінская артылерыя ўранні нанесла ўдар па месцы размяшчэння расійскіх войскаў у былым доме адпачынку ў акупаваным Бярдзянску, за 140 кіламетраў ад лініі фронту, паведамілі расійскія ваенкары. Пасля абеду хвост дыму з'явіўся ўжо ў порце Бярдзянска. А ўчора ўвечары дзве ўкраінскія ракеты пацэлілі ў расійскі аб’ект на тэрыторыі завода «Азоўсталь» у акупаваным Марыупалі.
У Севастопаль вярнуўся расійскі карабель «Іван Хурс», атакаваны ўкраінскімі беспілотнікамі. Расійскія СМІ паведамляюць, што ён прыйшоў сваім ходам.
У Белгародскай вобласці ўкраінцы прасавалі артылерыяй расійскія пазіцыі ў прыгранічных раёнах, у тым ліку ў горадзе Шабекіна, а ў Курскай вобласці абстралялі фартыфікацыйныя ўмацаванні на мяжы.
Былы кіраўнік «Раскосмаса» Дзмітрый Рагозін у тэлеграме паведаміў, што абстрэлы расійскіх пазіцый уздоўж лініі фронту пад Запарожжам і Данецкам дасягнулі нечуванай раней інтэнсіўнасці.
Сёння расійскія ўлады прызналі таксама, што 23 мая страцілі яшчэ адзін штурмавік Су-24 пад Мелітопалем. Лётчык здолеў прызямліць пашкоджаны самалёт на аэрадроме, пасля чаго прагучаў выбух.
