Ілюстрацыйнае фота: «Наша Ніва»
Сёмая назва менш чым за два гады
Махлярскі акаўнт, на якім размешчана рэклама аб продажы кветак па нечувана нізкіх цэнах, называецца cvetok.boutique.by. Ён быў створаны ў лютым 2022 года, а першы допіс у ім датуецца толькі 27-28 студзеня 2023 года. Апошняя публікацыя была зробленая 8 лютага гэтага года. За гэты час профіль ужо шэсць разоў мяняў назву. Цяпер на яго падпісана амаль 10 тысяч чалавек.
Скрыншот з акаўнта cvetok.boutique.by
І калі допісы даўно не абнаўляліся, то свежыя гісторыі з нечуванымі акцыямі на букеты з 51 і са 101 кветкі з'яўляюцца рэгулярна.
Скрыншот з акаўнта cvetok.boutique.by
Букеты прыгожыя, а цэны прывабныя. Напэўна, нідзе больш, апроч як у махляроў, такія букеты за такія грошы не сустракаюцца.
Махляры даволі хутка адказваюць на паведамленні ў сацсетках. Яны гатовыя прывезці букеты ў любы пункт Беларусі, пры гэтым не патрабуюць дадатковай аплаты за дастаўку. Зламыснікі сцвярджаюць, што кветкі будуць дастаўленыя кур'ерам на аўтамабілі з кандыцыянерам у любы зручны для вас час.
Калі патэнцыйны кліент, а па факце патэнцыйная ахвяра махляроў, пагаджаецца на надзвычайна прывабныя ўмовы дастаўкі, кліента просяць выслаць адрас, імя, прозвішча атрымальніка, кантактны нумар і пажаданы час дастаўкі.
Скрыншот перапіскі
Пасля таго як махляры атрымліваюць гэтыя звесткі, яны хутка высылаюць паведамленне, дзе пазначаюць, што працуюць па 100% перадаплаце, і адразу абгрунтоўваюць гэта тым, што ў іх сталі часцей з'яўляцца несапраўдныя заказы, адмовы ад букетаў, калі тыя ўжо былі гатовыя і г.д.
Разлічвацца прапануюць не на рахунак ІП або юрыдычнай асобы, а праз звычайнае папаўненне банкаўскай карткі, якая належыць фізічнай асобе.
Скрыншот перапіскі
Надзвычай нізкія цэны, гатоўнасць без дадатковай аплаты даставіць кветкі ў любое месца і прапанова разлічыцца шляхам пераводу грошай на картку фізічнай асобе — не адзіныя званочкі, якія могуць дапамагчы зразумець, што гэта махляры.
Фотаздымкі, якія махляры размяшчаюць у профілі, проста ўзятыя ў інтэрнэце. Напрыклад, фота велізарнага букета, які складаецца з руж белага і чырвонага колераў, першапачаткова было апублікавана на сайце прадаўца кветак у расійскім Варонежы.
Скрыншот з інстаграм-профіля cvetok.boutique.by і сайта cvetochnidvorik.ru. Калаж: «Наша Ніва»
Расійскія прадаўцы прадаюць букет са 101 ружы па 13 780 расійскіх рублёў. Гэта каля 460 беларускіх рублёў. Махляры ж «прадаюць» падобныя букеты па 250 рублёў.
Яшчэ адзін званочак, які мусіць насцярожыць, — гэта абмежаваная магчымасць пакідаць каментары пад допісамі.
Адзначым, што гэта не першы выпадак, калі інфармацыя пра кветкавых махляроў даходзіць да СМІ. Выглядае, што выпадкі, калі людзі вядуцца на нізкія цэны і пералічваюць грошы махлярам, не адзінкавыя.
Часам людзі гублялі не толькі грошы, якія яны пералічылі за кветкі. У адных выпадках махляры дадаюць ахвяр у чорны спіс, пасля таго як атрымаюць грошы, а ў іншых пагаджаюцца вярнуць грошы за кветкі, якія ў іх нібыта не атрымалася даставіць у дамоўлены час. У такіх выпадках яны дасылаюць ахвярам спасылкі на адмысловыя сайты, дзе дзеля вяртання грошай трэба ўвесці ўсе рэквізіты банкаўскай карткі, у тым ліку CVV-код.
Чытайце таксама:
Як махляры падманваюць беларусаў. Сабралі найбольш папулярныя метады
Мінская фірма прапануе машыны з Еўропы на замову па нерэальна нізкіх цэнах. У чым падвох?
Новы від махлярства? Беларусам прапануюць адпачынак у неіснуючым доме на дрэве
«За кошт амартызацыі пры лізінгу машына выходзіць на 40% танней». У Беларусі актывізаваліся аўтамахляры. Па якой схеме яны працуюць?
