Ала Сакаленка падчас допыту. Скрыншот відэа АТН
У канцы сакавіка 2022 года з'явілася абвестка пра знікненне дзвюх жанчын з Латвіі — Алы Сакаленка і Дзіяны Бахмуты. Паведамлялася, што 28 сакавіка яны не вярнуліся ў Латвію. Апошні раз жанчын бачылі 27 сакавіка ў Гомелі, дзе яны павінны былі сесці на цягнік. Пазней стала вядома, што Сакаленка затрымалі ў межах крымінальнай справы за агентурную дзейнасць на карысць Латвіі.
14 снежня 2022 года на дзяржаўным тэлебачанні выйшаў фільм «Контрразведка. Аперацыі беларускага КДБ супраць спецслужбаў Захаду і Украіны», дзе распавядалася і пра справу Алы Сакаленка.
У фільме ёсць кадры затрымання грамадзянкі Латвіі: на вуліцы каля жанчыны з чамаданам і пакетам спыняецца цёмны мікрааўтобус, адкуль выбягаюць пяцёра мужчын, у якіх на спінах напісана «КГБ». Адзін з іх здымае ўсё на відэакамеру. Алу завялі ў мікрааўтобус. З іншага боку таксама пад'ехала машына — у яе супрацоўнікі завялі жанчыну ў жоўтай куртцы. Меркавана, гэта Дзіяна Бахмута, пра якую пісалі ў абвестцы пра знікненне — там гаварылася пра жанчыну ў жоўтай куртцы і сініх джынсах. Пазней МЗС Латвіі ўдакладніла, што Дзіяна ўсё ж вярнулася ў Латвію.
«Да гэтага часу [затрымання] на яе знайшлі дастаткова доказаў і матэрыялаў. Сакаленка на заданне латвійскіх спецслужбаў рыхтавала да вярбоўкі беларускіх вайскоўцаў, збірала даныя, стварала кампраметуючыя сітуацыі, якія потым і служаць падставай для вярбоўкі замежнікамі», — пракаментавалі справу Сакаленка ў фільме АТН.
Грамадзянка Латвіі ўтрымліваецца пад вартай у СІЗА. Прэс-сакратар МЗС зазначыў, што амбасада Латвіі ў Віцебску аказвае ёй консульскую дапамогу ў межах магчымасцяў.
Таксама ў ведамстве адзначылі, што колькасць затрыманых грамадзян Латвіі рэзка ўзрасла пасля ўвядзення бязвізавага рэжыму 15 красавіка 2022 года, і настойліва заклікалі грамадзян Латвіі не ездзіць у Беларусь, бо магчымасці Латвіі па аказанні консульскай дапамогі затрыманым грамадзянам абмежаваныя.
