Сённяшні выгляд кінатэатра «Масква» з выразным вынасам глядзельнай залы хутка кардынальна зменіцца. Фота: Wikimedia Commons

Сённяшні выгляд кінатэатра «Масква» з выразным вынасам глядзельнай залы хутка кардынальна зменіцца. Фота: Wikimedia Commons

Тэлеграм-канал «Спадчына», які спецыялізуецца на ахове архітэктурнай спадчыны Беларусі, звярнуў увагу на тое, што прэзентаваны УКБ Цэнтральнага раёна праект хавае ад усіх галоўнае.

Актывісты зачапіліся за дзіўны ракурс адзінкавага рэндара вонкавага выгляду кінатэатра пасля рэканструкцыі. Гэты ракурс зроблены строга «анфас», у той час як добрым тонам у архітэктуры лічацца больш натуральныя ракурсы пад вуглом да галоўнага фасада, а пры наяўнасці гатовай мадэлі нішто не замінае зрабіць некалькі такіх рэндараў.

Гэтак жа дзіўна паказаныя і інтэр’еры, у кадр не трапляе вонкавае зашкленне ў фае. Відаць, таму, што найбольш кардынальныя змены тычацца менавіта яго.

Праект рэканструкцыі кінатэатра, які быў прэзентаваны ў 2019 годзе, выклікаў моцнае абурэнне ў спецыялістаў і грамадскасці.

Праект рэканструкцыі кінатэатра, які быў прэзентаваны ў 2019 годзе, выклікаў моцнае абурэнне ў спецыялістаў і грамадскасці.

У канцы 2019 года прэзентаваны варыянт рэканструкцыі кінатэатра, які прадугледжваў, што цяперашні будынак апынецца быццам у шкляным сеткаватым кошыку, выклікаў вялікае абурэнне не толькі сярод спецыялістаў, але і сярод шырокай грамадскасці. Фактычна гэта азначала знішчэнне аднаго з найбольш пазнавальных помнікаў савецкага мадэрнізму ў Беларусі, які да таго ж уваходзіць у ансамбль праспекта Пераможцаў. 

Тады, адчуўшы супраціўленне, ад праекта рэканструкцыі быццам бы адмовіліся. Але цяпер усплыў перароблены праект, да рэалізацыі якога прыступяць у кастрычніку без усялякіх папярэдніх грамадскіх абмеркаванняў. Калі звярнуць увагу на дэталі, то будзе зразумела, што гэта больш кансерватыўны і прымітыўны варыянт таго, што прапаноўвалася ў 2019 годзе.

Адзіны рэндар, на якім паказалі вонкавае аблічча абноўленага кінатэатра. Фота: Мінск Навіны

Адзіны рэндар, на якім паказалі вонкавае аблічча абноўленага кінатэатра. Фота: Мінск Навіны

Цяперашні выгляд кінатэатра. Нават з улікам розных кропак, з якіх зроблены кадры, бачна, што фасад пасля рэканструкцыі зраўняецца з краем вынасу глядзельнай залы, утварыўшы шкляны куб. Фота: Анлайнер

Цяперашні выгляд кінатэатра. Нават з улікам розных кропак, з якіх зроблены кадры, бачна, што фасад пасля рэканструкцыі зраўняецца з краем вынасу глядзельнай залы, утварыўшы шкляны куб. Фота: Анлайнер

Актывісты звярнулі ўвагу на тое, што сёння суцэльнае зашкленне фасада кінатэатра зроблена так, што добра прасочваецца ніз кансольнага вынасу глядзельнай залы, але на рэндары ён увесь ужо схаваны за шкляной сцяной. Гэта азначае, што ў час рэканструкцыі плануюць істотна павялічыць плошчу кінатэатра за кошт плошчы перад ім. 

Гэта магло быць недакладнасцю ці спрашчэннем рэндара, але такіх хібаў занадта шмат: перад усім фасадам будынка ўзнікае балкон, які раней меўся толькі з бакоў, тамбур, які раней выступаў вонкі, цяпер заглыблены.

Гэта азначае, што з вялікай верагоднасцю кінатэатр «Масква» зменіць сваё пазнавальнае аблічча. Са знаёмага застанецца толькі дэкаратыўная кампазіцыя, якая адсылае да зубцоў Маскоўскага крамля, але архітэктура будынкаў, тым больш мадэрнісцкіх, гэта не столькі дэкор, колькі аб’ёмна-прасторавае рашэнне. Замест выразнага вынасу кіназалы мінчукі атрымаюць невыразны шкляны куб.

Таксама ў горшы бок зменіцца і аздоба. Калі раней гэта быў белы мармур, то цяпер яго месца зойме танны керамаграніт. Падобнае рашэнне ўжо было рэалізавана ў 2022 годзе на канцэртнай зале «Віцебск» у абласным цэнтры, дзе таксама быў збіты натуральны камень, месца якога заняў уцеплены вентфасад.

Па фота можна зразумець, што па сваіх вартасцях натуральны камень не ідзе ні ў якое параўнанне з керамагранітам, які выглядае як дрэнная тэкстура ў відэагульні. Тое ж самае цяпер чакае і сталічны кінатэатр.

Канцэртная зала «Віцебск» у час і пасля рэканструкцыі. Такое ж рашэнне чакае і сталічны кінатэатр. Фота: vitebsk.biz

Канцэртная зала «Віцебск» у час і пасля рэканструкцыі. Такое ж рашэнне чакае і сталічны кінатэатр. Фота: vitebsk.biz

Таксама звяртае на сябе ўвагу той факт, што мясцовыя чыноўнікі чыняць перашкоды для ўзяцця пад ахову будынка кінатэатра. У выпадку надання яму статусу помніка архітэктуры перабудовы фасадаў стануць немагчымымі. 

Як паведамляюць на канале актывісты, яшчэ ўлетку мінулага года яны падалі ў Мінгарвыканам 130-старонкавую прапанову, каб надаць статус гісторыка-культурнай каштоўнасці ансамблю праспекта Пераможцаў. Мясцовы савет разглядзеў прапанову і для прыняцця станоўчага рашэння па прысваенні ансамблю статусу помніка архітэктуры даручыў гарадскому камітэту архітэктуры ўдакладніць участкі, на якіх размешчаны будынкі ансамблю. 

Але ў гарвыканкаме гэтае даручэнне сабатавалі. За год, які мінуў з моманту падачы прапановы, яна так і не была ўдакладнена і не была разгледжана паўторна.

Офісны будынак на заднім плане кінатэатра — будынак Міністэрства культуры, які мусіў бы дбаць пра захаванне культурнай спадчыны. Фота: Wikimedia Commons

Офісны будынак на заднім плане кінатэатра — будынак Міністэрства культуры, які мусіў бы дбаць пра захаванне культурнай спадчыны. Фота: Wikimedia Commons

Але гэта азначае, што работы, якія пачнуцца ў кастрычніку на кінатэатры, будуць незаконнымі. Паводле Кодэкса аб культуры да дня прыняцця рашэння аб неабходнасці надання ахоўнага статусу мусяць быць прыпынены любыя работы, якія могуць аказаць уздзеянне на аб’ект.

Рэканструкцыя будзе здзяйсняцца пад вокнамі профільнага Міністэрства культуры, але малаверагодна, што ў цяперашняй Беларусі гэта неяк паўплывае на сітуацыю.

Чытайце таксама: 

Кінатэатр «Масква» ў Мінску чакае капітальны рамонт

Лукашыстаў занепакоіла знішчэнне спадчыны. Але ёсць нюанс

Архітэктурныя творы аўтара бела-чырвонага-белага сцяга прызнаныя Сусветнай спадчынай ЮНЕСКА

Клас
4
Панылы сорам
9
Ха-ха
0
Ого
3
Сумна
3
Абуральна
33

Хочаш падзяліцца важнай інфармацыяй ананімна і канфідэнцыйна?