Аварыя аўтобуса з турыстамі ў Венецыі. Фота: Antonio Calanni / AP
Прынамсі 21 чалавек, у тым ліку двое дзяцей, загінулі пасля таго, як аўтобус зляцеў з эстакады блізу італьянскай Венецыі і загарэўся, піша Бі-бі-сі — Украіна.
Мясцовыя ўлады паведамілі, што сярод загінулых ёсць украінцы. Выданні Repubblica і Ansa называюць іх колькасць — прынамсі пяцёра.
Як паведамляюць мясцовыя СМІ, яшчэ 18 чалавек атрымалі раненні ў выніку аварыі. Сярод іх у цяжкім стане пяць чалавек. Мясцовыя СМІ пішуць, што сярод цяжкапараненых ёсць украінцы — 4-гадовая дзяўчынка і 50-гадовая жанчына.
Асобы 14 загінулых яшчэ не ўстанавілі.
Аўтобус прабіў шлагбаум і ўпаў каля чыгуначных шляхоў у раёне Местрэ, які злучаецца з Венецыяй мостам.
Паводле паведамленняў, ён быў арандаваны для перавозкі турыстаў паміж Венецыяй і кемпінгам у суседнім раёне Маргера.
Мэр Венецыі Луіджы Бруньяра заявіў, што адбылася «вялікая трагедыя». «Апакаліптычная сцэна, няма слоў», — напісаў ён у X.
Інцыдэнт адбыўся прыкладна а 19:45 паводле мясцовага часу (17:45 паводле Грынвіча), калі аўтобус вяртаўся з турыстамі ў кемпінг.
Паводле некаторых паведамленняў, аўтобус, які працаваў на метане, упаў на лініі электраперадачы і загарэўся.
«Фактарам павелічэння наступстваў стаў метан, і пажар хутка распаўсюдзіўся», — сказаў міністр унутраных спраў Матэа Піянтэдосі, папярэдзіўшы, што колькасць загінулых можа ўзрасці.
Губернатар рэгіёну Лука Зая сказаў, што сярод загінулых і параненых ёсць людзі «розных нацыянальнасцяў, не толькі італьянцы».
Прычына аварыі пакуль невядомая, на месцы здарэння працягваюць працаваць ратавальнікі.
Прэм'ер-міністр Італіі Джорджа Мелоні заявіла, што сочыць за развіццём падзей, і выказала спачуванні.
Прэзідэнт Еўрапейскай камісіі Урсула фон дэр Ляен заявіла, што падтрымлівае італьянскіх лідараў у гэты «момант глыбокага болю».
Чытайце таксама:
