Šviedskaha pravaabaroncu nie puścili ŭ Biełaruś, bo jon žorstka abychodzicca z miakkimi cackami
08.05.2014 / 14:53
Kiraŭnik šviedskaj pravaabarončaj arhanizacyi Ostgruppen Marcin Uhła pakinuŭ Biełaruś 8 maja. Jon vylecieŭ u Vilniu. Dahetul Uhła znachodziŭsia ŭ tranzitnaj zonie Nacyjanalnaha aeraporta Minsk.
Marcin Uhła ŭ Vilni, fota z fejsbuka Taćciany Reviaki
Ab hetym BiełaPAN paviedamiŭ pres-sakratar Dziaržaŭnaha pahraničnaha kamiteta Alaksandr Ciščanka.
Nahadajem, Marcina Uhłu nie puścili ŭ Biełaruś 7 maja. Pamiežniki paviedamili, što ŭjezd šviedu ŭ Biełaruś zabaronieny.
Jak zajaviŭ Alaksandr Ciščanka, Uhła sapraŭdy ŭklučany ŭ tak zvany «stop-list» i samamu šviedu ab hetym było viadoma. «Čałaviek pryjechaŭ papijarycca, viedajučy, što jon tut niepažadanaja piersona, — adznačyŭ pres-sakratar Dziaržpahrankamiteta.
— Jon nie balelščyk, chakiej nie lubić, krainu nienavidzić, žorstka abychodzicca z miakkimi cackami».
(Vosieńniu 2012 hoda Ostgruppen źbirała ŭ Šviecyi plušavych miadźviedziaŭ, kab pa pošcie adpravić ich biełaruskim čynoŭnikam, uklučanym u čorny śpis JeS.)
«Vizit Uhła ŭ Biełaruś — heta apošniaja kropka ŭ jaho marnych namahańniach pa admienie čempijanatu śvietu», — kanstatavaŭ Ciščanka.
Nahadajem, u studzieni Uhła ŭ svaim błoku pisaŭ, što biełaruskija vizy i akredytacyi pieraškadžajuć čempijanatu śvietu pa chakiei, a mienavita: što zamiežnyja žurnalisty, jakija žadajuć atrymać akredytacyju na chakiejnaje pieršynstvo ŭ Minsku, pavinny pisać tolki pra sport. «Usie žurnalisty, jakija chočuć aśviatlać temy, nie źviazanyja z chakiejnym ČS, pavinny dabivacca akredytacyi ŭ MZS krainy-haspadyni, a heta našmat bolš składany i biurakratyčny praces», — napisaŭ Uhła.
Šviedskaja pravaabarončaja arhanizacyja Ostgruppen zjaŭlajecca adnym ź inicyjataraŭ mižnarodnaj kampanii «Nie hulajcie z dyktataram», nakiravanaj suprać praviadzieńnia chakiejnaha čempijanatu śvietu 2014 hoda ŭ Minsku.