«Дударскі клуб» адбудзецца 25 лютага
Вечарыны дудароў будуць праходзіць штосераду — цяпер у Jack Club.
23.02.2015 / 13:55
«Легендарныя вечарыны Дударскага клуба, якія цягам 2007-2012 з маленькай кавярні выраслі да самага вялікага клуба Мінска — аднаўляюцца праз тры гады перапынку ў абноўленым фармаце», — пішуць арганізатары сустрэчы.
Ад 19:00 у Jack Club (вул. Няміга, 12, пад ГЦ «На Нямізе») зайграюць беларускія дуды. Уваход — сімвалічныя 50 тысяч, якія будуць кампенсаваныя бясплатным напоем на выбар.
На вечарынах можна не толькі седзячы слухаць дудароў, але і вучыцца танцам розных народаў. Напачатку вечарын арганізатары абяцаюць невялікія расповеды ці фільмікі на тэму традыцыйнай культуры і музыкі пры падтрымцы Студэнцкага Этнаграфічнага Таварыства.
«У гэтым сезоне мы троху змяшчаем акцэнт з выключна дудаў да народнай музыкі агулам, ня толькі беларускай. Дуды нікуды не сыходзяць, але фармат пашыраецца інструментальна да скрыпак, ліраў і іншых цымбалаў, а геаграфічна ахоплівае як мінімум бабульку Еўропу», — сцвярджаюць арганізатары.