Pucin pahražaŭ Zachadu jadziernaj zbrojaj z-za Kryma
Prezident Rasii zajaviŭ, što ŭ vypadku niespryjalnaha raźvićcia padziej u Krymie Maskva mahła pryvieści ŭ hatoŭnaść jadziernyja siły.
15.03.2015 / 16:55
ria.ru
Ab hetym kiraŭnik rasijskaj dziaržavy raskazaŭ u dakumientalnym filmie «Krym. Šlach na Radzimu», pakazanym na telekanale «Rasija 1» [na terytoryi Biełarusi praz spadarožnik tranślacyja pačniecca ŭ 22:00].
«Ja adrazu ž na pieršym etapie pracy vymušany byŭ adpaviednym čynam zaryjentavać našy Uzbrojenyja siły. Nie prosta zaryjentavać, a dać pramyja ŭkazańni, zahady z nahody mahčymych pavodzinaŭ Rasii i našych Uzbrojenych sił pry lubym raźvićci padziej», — skazaŭ Pucin.
Adkazvajučy na pytańnie ab tym, ci hatovaja była Rasija pryvieści ŭ stan bajavoj hatoŭnaści svaje jadziernyja siły, Pucin skazaŭ: «My hatovyja byli heta zrabić».
Krym rasijski lidar nazvaŭ «našaj histaryčnaj terytoryjaj», dzie «pražyvajuć ruskija ludzi», jakija akazalisia «ŭ niebiaśpiecy» paśla zładžanaha ŭkrainskimi «nacyjanalistami» dziaržaŭnaha pieravarotu.
Miarkujučy pa słovach Uładzimira Pucina, jon vieryć u toje, što ZŠA byli hatovyja ŭstupić u vajnu za Krym.
«Nie my ździejśnili dziaržpieravarot [tak nazyvaje Pucin źmienu ŭłady va Ukrainie ŭ vyniku pratestaŭ na Majdanie], heta zrabili nacyjanalisty i ludzi z krajnimi pierakanańniami. Vy ich padtrymali. Ale vy dzie znachodziciesia? Za tysiačy kiłamietraŭ?
A my tut, i heta naša ziamla! Vy za što chočacie tam zmahacca? Nie viedajecie? A my viedajem. I my na heta hatovyja», — kaža ŭ filmie rasijski prezident, vidavočna, źviartajučysia da Złučanych Štataŭ.
Pavodle jaho pryznańnia anieksija Kryma supravadžałasia vajskovaj apieracyjaj, nakiravanaj na toje, kab abaranić paŭvostraŭ ad mahčymaha vajennaha zachopu.
Prezident Rasii taksama raspavioŭ, što rakietnyja kompleksy «Bastyjon» byli razhornutyja ŭ Krymie z peŭnym namieram - tak, kab ich było vidać z mora.
«My zrabili z Kryma krepaść. I z mora, i z sušy», — śćviardžaje rasijski prezident u filmie.
Uładzimir Pucin taksama pryznaŭ, što ŭ apieracyi pa anieksii Kryma ŭdzielničali padraździaleńni HRU i marskoj piachoty, pierad jakimi stajała zadača pa niejtralizacyi ŭkrainskich vajskovych častak, raskvataravanych na paŭvostravie.
«Patrebnyja byli śpiecyjalisty, jakija ŭmiejuć heta rabić. Tamu ja daŭ daručeńni i ŭkazańni ministerstvu abarony, čaho chavać, pad vyhladam uzmacnieńnia achovy našych vajskovych abjektaŭ u Krymie pierakinuć tudy śpiecpadraździaleńni hałoŭnaha raźviedupraŭleńnia i siły marskoj piachoty, desantnikaŭ», — raspaviadaje Pucin.
Pry hetym jon dadaŭ, što nie skarystaŭsia dazvołam Rady Fiederacyi na ŭvod vojskaŭ va Ukrainu, a kolkaść asabovaha składu bazy Čarnamorskaha fłotu ŭ Krymie nie była pieravyšanaja.
«Navat nie spatrebiłasia skarystacca dazvołam Rady Fiederacyi ab uviadzieńni našych vojskaŭ va Ukrainu, ja ž nie pakryviŭ dušoj. Bo pavodle adpaviednaj mižnarodnaj damovy na našaj vajskovaj bazie va Krymie my mieli prava mieć 20 tysiač čałaviek. Navat bolš troški. Navat pry toj kolkaści, jakuju my dadali, my 20 tysiač nie nabrali», — kaža Pucin u filmie.
«Ja zajmaŭsia hetym asabista»
Pośpiech usioj hetaj apieracyi, pa słovach rasijskaha lidara, byŭ nakanavany tym, što kiravaŭ joj jon sam asabista: «Naša pieravaha, viedajecie, u čym zaklučałasia? U tym, što ja zajmaŭsia hetym asabista. Nie tamu, što ja tam usio pravilna rabiŭ, a tamu što, kali heta robiać pieršyja asoby dziaržavy, to vykanaŭcam lahčej pracavać «.
«Jany heta adčuvajuć, razumiejuć i viedajuć, što jany vykonvajuć zahad, a nie zajmajucca svavolstvam. A kali dziaržaŭnaja struktura znachodzicca ŭ razvale abo ŭ napaŭrazvalenym stanie, to zahady albo naohuł nie addajucca, albo nie dachodziać da vykanaŭcaŭ, albo ŭ ich lehitymnaści jość vialikija sumnievy», — ličyć Uładzimir Pucin.
Farmalna apazicyju, pierš za ŭsio, padtrymlivali jeŭrapiejcy, ale my vydatna viedali, nie prosta addavali sabie spravazdaču, a viedali,
što realnymi lalkavodami byli našy amierykanskija partniory i siabry.
Heta jany dapamahali rychtavać nacyjanalistaŭ, jany dapamahali rychtavać bajavyja atrady», — skazaŭ Pucin u filmie.
Pavodle słoŭ Pucina, «padrychtoŭka bajavych atradaŭ» adbyvałasia na terytoryi Polščy i Litvy.
«Jak pastupili našy partniory? Spryjali ździajśnieńniu dziaržaŭnaha pieravarotu. Heta značyć pačali dziejničać z pazicyi siły. Ja nie dumaju, što heta samy lepšy sposab viadzieńnia spraŭ», — dadaŭ Pucin.
Taksama jon skazaŭ, što hałoŭnaj metaj rasijskaj anieksii Kryma było niedapuščeńnie krovapralićcia.
«Upeŭnieny, što, majučy na ŭvazie etničny skład nasielnictva ŭ Krymie, tam było b jašče horš [čym na Majdanie]. My pavinny byli raspačać peŭnyja dziejańni pa niedapuščeńni takoha niehatyŭnaha raźvićcia padziej, kab nie było trahiedyj, jakija potym paźniej razyhralisia ŭ Adesie, kali žyŭcom byli spalenyja dziasiatki ludziej. Nam nielha było ni ŭ jakim vypadku dapuścić krovapralićcia», - skazaŭ Pucin u filmie.
«Janukoviča chacieli likvidavać»
Uładzimir Pucin zajaviŭ, što nie asudžaje rašeńnie eks-prezidenta Ukrainy Viktara Janukoviča nie ŭžyvać zbroju suprać pratestoŭcaŭ, ale adznačyŭ, što heta biaździejnaść pryviała da ciažkich nastupstvaŭ.
Pucin nazvaŭ rašeńnie eks-prezidenta Janukoviča nie ŭžyvać zbroju suprać Majdana «biaździejnaściu», jakoje pryviało da «ciažkich nastupstvaŭ»
«Ja nie chaču davać acenku jaho [Janukoviča] pracy. Jon skazaŭ:» Ja nie moh padpisać zahad na vykarystańnie zbroi. U mianie ruka nie padniałasia»… Ci možna jaho asudžać za heta? Ja nie viedaju. I ja nie źbirajusia hetaha rabić. Nie liču siabie maje prava hetaha rabić. Dobra heta ci drenna — nastupstvy ciažkija ad biaździejnaści. Heta vidavočna», — skazaŭ Pucin u filmie «Krym. Šlach na Radzimu».