Будуць перагледжаныя навучальныя праграмы для першых, пятых і дзясятых класаў
09.04.2015 / 15:40
У новым навучальным годзе ў першых, пятых і дзясятых класах будуць укаранёныя новыя навучальныя праграмы і тыпавыя навучальныя планы, паведаміла на прэс-канферэнцыі 9 красавіка ў Мінску намеснік міністра адукацыі Раіса Сідарэнка.
«Праз год па новых навучальных планах і новых праграмах будуць працаваць ужо 5-ы і 6-ы, на трэцяй ступені — 10-ы і 11-ы класы. Такім чынам, паступова, плаўна, на працягу пяці гадоў мы выйдзем на адносную завершанасць базавай адукацыі. І тады мы яшчэ раз перагледзім навучальныя праграмы ў 10-11-х класах», — сказала яна.
Па словах намесніка міністра, у цяперашні час базавая адукацыя не дае вучням поўную карціну аб некаторых прадметах, да прыкладу, навучальная праграма па гісторыі ў 9-м класе заканчваецца на Кастрычніцкай рэвалюцыі 1917 года.
«Калі пасля 9-га класа выпускнік прымае рашэнне, што не пойдзе ў ВНУ, а працягне навучанне ва ўстанове прафесійна-тэхнічнай адукацыі, то, выходзячы з 9-га класа, па ўсіх вучэбных прадметах ён павінен мець адносна поўную карціну аб гэтым прадмеце», — адзначыла яна.
«Каб пазбавіцца ад такіх негатыўных момантаў, усе навучальныя праграмы будуць перагледжаныя, — сказала Сідарэнка. — Але гэта не значыць, што зараз мы будзем нешта ламаць, уводзіць нейкія новыя схемы. Гэтага не будзе».
У навучальных праграмах першых класаў практычна не ўносяцца змены, а ў пятых класах змяненні закрануць новы прадмет «Айчынная і сусветная мастацкая культура», адзначыла намеснік міністра.
«Плануем выкладанне гэтага прадмета па модульным прынцыпе, з улікам узроставых асаблівасцяў. Напрыклад у пятым класе ён будзе больш звязаны з прадметамі «Маляванне», «Музыка», а ў дзявятым класе мы, вядома, выйдзем на іншы ўзровень», — адзначыла Сідарэнка.
Паводле яе слоў, новы прадмет будуць выкладаць ранейшыя настаўнікі сусветнай мастацкай культуры, а таксама педагогі, у якіх гэты прадмет быў не асноўным, але яны таксама могуць весці заняткі.
У 10-х класах у новым навучальным годзе будзе даступна вывучэнне прадметаў як на базавым, так і на паглыбленым узроўні.