Марадона абвінаваціў Блатэра ў карупцыі і заклікаў яго сысці
10.04.2015 / 18:50
Адзін з самых рэзультатыўных гульцоў у гісторыі футбола — 54-гадовы аргентынец Дыега Марадона — рэзка раскрытыкаваў пятае вылучэнне 79-гадовым Ёзэфам Блатэрам сваёй кандыдатуры на пасаду прэзідэнта ФІФА.
Марадона адкрытым тэкстам абвінаваціў Блатэра ў карумпаванасці і дадаў: «Гэты чалавек валодае неабмежаванай уладай, хоць ні разу ў жыцці не біў па мячы».
На думку футбаліста, рэальныя шанцы перамагчы Блатэра ў барацьбе за пасаду ёсць толькі ў іярданскага прынца Алі бін Хусэйна.
Акрамя Блатэра і Хусэйна, афіцыйнымі кандыдатамі таксама з'яўляюцца кіраўнік Каралеўскага футбольнага саюза Нідэрландаў Міхаэль ван Празе і былы футбаліст «Рэала» і «Барселоны» Луіш Фігу.
«Я гатовы пайсці і сказаць Блатэру: сыходзь, ты і так дастаткова нашкодзіў», — сказаў Марадона.
Выбары новага прэзідэнта ФІФА пройдуць 29 мая. Швейцарац кіруе арганізацыяй з 1998 года.