Фільм Курэйчыка «ГараШ» выклалі ў інтэрнэт
03.06.2016 / 17:40
Сёння ў анлайн-кінатэатрах AFISHA.TUT.BY адбылася абяцаная інтэрнэт-прэм'ера фільма Андрэя Курэйчыка «ГараШ». Як адзначаюць аўтары, гэта эксперыментальны нацыянальны кінапраект, зняты як альтэрнатыва «пафаснаму афіцыёзу і гіганцкім блокбастарам».
Гісторыя пра жыццё аўтаслесараў Шабаноў — незалежнае некамерцыйнае кіно пра Беларусь без дзяржаўнай і прадзюсерскай падтрымкі. Незвычайнасць і нонканфармізм «ГараШа» падкрэсліваецца і акцёрскім складам: разам з зоркай постсавецкага кінематографа Эвялінай Сакура і артыстамі беларускіх тэатраў ролі выконваюць карыфеі беларускага року з групы «Нейра Дзюбель» Аляксандр Кулінковіч і Юрый Навумаў, музыкант гуртоў «Ягор Забелаў Трыа» і «Гурзуф» Ягор Забелаў і іншыя.