Minčuk abakraŭ ułasnych baćkoŭ i insceniravaŭ rabavańnie ich kvatery

22.09.2016 / 17:22

Upraŭleńnie Śledčaha kamiteta pa Minsku rasśleduje kryminalnuju spravu ŭ dačynieńni da minčuka, jaki insceniravaŭ rabavańnie kvatery baćkoŭ, paviedamili va USK.

«Śledčyja Partyzanskaha (h. Minska) rajonnaha addzieła Śledčaha kamiteta vyśvietlili sapraŭdnyja abstaviny kryminalnaj spravy pra dvuch nieviadomych, jakija sa słoŭ paciarpiełaha adkryta vykrali hrašovyja srodki z kvatery jaho baćkoŭ. Praca śledčych, apieratyŭnych supracoŭnikaŭ milicyi i ekśpiertaŭ na miescy zdareńnia, a taksama praviedzieny ŭ nastupnym kompleks śledčych dziejańniaŭ i apieratyŭna-vyšukovych mierapryjemstvaŭ dazvolili atrymać nieabchodnyja dokazy, jakija vyklučajuć mahčymaść rabavańnia kvatery», — adznačyli va ŭpraŭleńni Śledčaha kamiteta.

Na pieršapačatkovym etapie zajaŭnik tłumačyŭ, što ŭ momant, kali jon adčyniŭ dźviery, na jaho napali dvoje mužčyn. Ad udaru pa hałavie jon straciŭ prytomnaść, a kali pryjšoŭ u siabie, vyjaviŭ, što baćkoŭskaja kvatera abrabavanaja.

Padčas papiaredniaha rasśledavańnia byŭ atrymany šerah dokazaŭ, jakija pakazvajuć na toje, što vysunutaja maładym čałaviekam viersija nie adpaviadaje rečaisnaści. Dalej, pry praviadzieńni pieratrusu pa miescy jaho faktyčnaha žycharstva, byli znojdzienyja vykradzienyja z kvatery baćkoŭ hrošy. Vyśvietliłasia, što 22-hadovy chłopiec vyrašyŭ papravić svajo materyjalnaje stanovišča za košt svajakoŭ. Zabraŭšy baćkoŭskija hrošy, jon spałochaŭsia mahčymaj adkaznaści za zroblenaje i insceniravaŭ rabavańnie. Raskidaŭ rečy pa pakojach, nanios sabie niekalki cialesnych paškodžańniaŭ, paśla čaho patelefanavaŭ u 102.

U dačynieńni da maładoha čałavieka raspačataja kryminalnaja sprava pa č.2 art.400 (zaviedama iłžyvy danos z karyślivych mierkavańniaŭ) KK RB.