Трамп паабяцаў павялічыць амерыканскую армію і выдаткі на абарону
07.12.2016 / 18:30
Абраны прэзідэнтам ЗША Дональд Трамп паабяцаў не займацца разбурэннем замежных рэжымаў, аднак змагацца з ісламскім тэрарызмам і захоўваць адносіны з саюзнікамі, сведчыць запіс з мерапрыемства ў Паўночнай Караліне.
Трамп адначасова паабяцаў павялічыць колькасць амерыканскіх узброеных сіл і адмяніць абмежаванні на фінансаванне арміі, якія наклаў прэзідэнт Барак Абама.
«Мы не хочам мець скарочаныя ўзброеныя сілы… Мы хочам узмацніць старое сяброўства і шукаць новых сяброў», — сказаў будучы прэзідэнт.
Мэціс і Трамп. Фота cdn.newsmax.com
«Мы разбудуем нашы ўзброеныя сілы не для агрэсіі, а для папярэджання агрэсіі. Мы шукаем міру шляхам сілы», — заявіў Трамп падчас выступу ў штаце Паўночная Караліна, недалёка ад буйной вайсковай базы Форт Брэг.
Генерал «Шалёны сабака» Джэймс Мэціс выступіў на мітынгу прыхільнікаў Трампа з кароткай прамовай. Трамп паклікаў Мэціса быць міністрам абароны ў сваёй адміністрацыі, аднак яму будзе патрэбны дазвол Кангрэса і Сената ЗША, бо генерал адносна нядаўна пакінуў службу ў марской пяхоце.