Z asablivaj žorstkaściu nanios nie mienš za 17 udaraŭ nažom: rasśledavańnie ab napadzie na nastaŭnicu skončana
15.12.2016 / 14:09
Upraŭleńniem Śledčaha kamiteta pa h. Minsku zavieršana rasśledavańnie kryminalnaj spravy ab zamachu na zabojstva nastaŭnicy z asablivaj žorstkaściu, u jakim abvinavačvajecca školnik, paviedamiła ŭ svaim fejsbuku aficyjny pradstaŭnik SK Jułija Hančarova.
U chodzie śledstva ŭstanoŭlena, što kala 8:00 23 maja 2016 hoda niepaŭnahadovy žychar h. Minska, 2001 hoda naradžeńnia, znachodziačysia ŭ adnym z kabinietaŭ himnazii №74, dziejničajučy z asablivaj žorstkaściu, nanios nastaŭnicy ruskaj movy i litaratury nie mienš jak 17 udaraŭ nažom, u tym liku, u vobłaść žyćciova važnych orhanaŭ. U suviazi z aktyŭnym supracivam paciarpiełaj, jaje paviedamleńniem svajakam ab ździejśnienym złačynstvie i svoječasovym akazańniem joj kvalifikavanaj miedycynskaj dapamohi, chłopiec nie zmoh davieści svoj namier da kanca.
U chodzie śledstva dapytana bolš za 50 śviedak, praviedzieny vialiki kompleks miedyka-kryminalistyčnych, bijołaha-hienietyčnych i daktyłaskapičnych daśledavańniaŭ, adznačajecca ŭ paviedamleńni.
Pa vynikach sudova-miedycynskaj ekśpiertyzy, pryčynienyja paciarpiełaj cialesnyja paškodžańni adnosiacca da katehoryi ciažkich.
Praviedzienaja ŭ dačynieńni da niepaŭnaletniaha stacyjanarnaja psichołaha-psichijatryčnaja ekśpiertyza pakazała, što abvinavačany ŭ pieryjad inkryminujemych jamu dziejańniaŭ moh u poŭnaj miery ŭśviedamlać značeńnie svaich dziejańniaŭ i kiravać imi.
Śledstvam pradjaŭlena abvinavačańnie niepaŭnaletniamu pa č. 1 art. 14, p. 6, 10 č. 2 art. 139 Kryminalnaha kodeksa Respubliki Biełaruś.
Užytaja prakuroram miera strymańnia ŭ dačynieńni da abvinavačanaha ŭ vyhladzie zaklučeńnia pad vartu pakinuta raniejšaj, adznačaje Jułija Hančarova.