Захопнікі лівійскага самалёта здаліся ўладам Мальты
Захопнікі лівійскага самалёта, які прызямліўся ў пятніцу ў аэрапорце Мальты, здаліся, пасля чаго іх абшукалі і ўзялі пад варту, паведаміў прэм'ер-міністр Мальты Джозэф Мускат.
23.12.2016 / 19:16
Фота AFP
Па дадзеных прызнанага міжнароднай супольнасцю ўрада Лівіі, двое захопнікаў Airbus A320, якія з'яўляюцца прыхільнікамі зрынутага прэзідэнта Лівіі Муамара Кадафі, прасілі аб прадастаўленні палітычнага прытулку на Мальце.
Да таго, як здацца, захопнікі лівійскага самалёта адпусцілі ўсіх пасажыраў і экіпаж лайнера. Як паведамляў раней Джозэф Мускат, першымі борт захопленага лайнера пакінулі жанчыны і дзеці.
На борце лівійскага самалёта, які выконваў ўнутраны рэйс, знаходзіліся 111 пасажыраў і 7 членаў экіпажа. Паводле папярэдняй інфармацыі, усе пасажыры — грамадзяне Лівіі, паведамляе BBC.