Jašče adna sprava za repost: invalid z-pad Śvietłahorska «raspaŭsiudziŭ» ekstremisckija materyjały
10.03.2017 / 15:25
Za adzin klik u mužčyny ŭžo kanfiskavali telefon plus paśla suda, chutčej za ŭsio, pakarajuć štrafam.
49 hadovy Alaksandr Rabiec z Paryčaŭ (pasiołak u Śvietłahorskim rajonie Homielskaj vobłaści) jašče ŭ studzieni repostnuŭ artykuł supołki Ukantakcie «Revalucyjnaje dziejańnie». Artykuł byŭ pryśviečany akcyi anarchistaŭ u Homieli: byli vyviešanyja płakaty na vyjezdach z horada z nadpisami «U novy hod z novymi padatkami» i «Padatki. Biespracoŭje. Pavyšeńnie cen. Z Novym Hodam».
Repostnuŭ i repostnuŭ. Uvohule, na staroncy Rabca šmat repostaŭ — jon invalid 1-j hrupy, nie moža chadzić. Nie pracuje, žyvie za piensiju pa invalidnaści.
«Lažu ŭ łožku, z telefona ŭvieś čas u internecie», — kaža mužčyna.
Ale ž 8 sakavika da Rabca zavitaŭ učastkovy milicyjant — mienavita nakont taho repostu. Vyśvietliłasia, što taja anarchisckaja supołka i paviedamleńni ŭ joj uniesienyja ŭ śpis ekstremisckich materyjałaŭ u RB i zabłakavanyja dla dostupu ŭ RB.
«Pryjšoŭ učastkovy. Kaža, nibyta niejki major ažno ź Minska, z kryminalnaha vyšuku daŭ jamu kamandu, — raspavioŭ «Našaj Nivie» Rabiec. — Skłali pratakoł na mianie».
Akramia taho, učastkovy kanfiskavaŭ pryładu, ź jakoj byŭ zrobleny pieradruk — mabilnik Alaksandra.
«Nu i paviedamiŭ, što sprava pieradajecca ŭ sud», — kaža Rabiec.
Ciapier mužčynu pahražaje administratyŭnaja adkaznaść — ad 10 da 50 bazavych. To bok, ad 230 da 1150 rubloŭ.