Дэвід Бэкхэм надзявае шкарпэткі пад шлёпанцы. Цяпер можна і нам?
Легенда англійскага футбола быў заўважаны на вуліцах горада ў галоўным модным антытрэндзе: шлёпанцах разам са шкарпэткамі.
02.08.2017 / 22:09
Фота: TheSunShowbiz.
Фотаздымак з такой прамашкай стаў мегапапулярным у сацыяльных сетках. Карыстальнікі жартавалі: «Ну, калі Дэвід носіць шкарпэткі з сандалямі, то гэта па-любому модна! Хлопцы па ўсім свеце павінны пачаць апранацца так проста цяпер!»
Мы спыталі ў беларускага блогера, эксперта па мужчынскай модзе Іллі Трыфаненкава, ці сапраўды можна смела спалучаць гэтыя рэчы, калі самі зоркі дыктуюць такія правілы.
Модны блогер Ілля Трыфаненкаў.
«Шкарпэткі пад шлёпанцы — гэта ніколі не было і не будзе модна. На гэтым табу робіцца хайп, і людзям хочацца зрабіць цалкам наадварот: так бы мовіць, награшыць перад модай. І Бэкхэм, хутчэй за ўсё, таксама зрабіў гэта спецыяльна: колер шкарпэтак у яго белы, так увогуле апранаюцца толькі мужчыны на Захадзе. У нас жа часцей за ўсё абіраюць цёмны колер (чорны або сіні), каб ніхто не бачыў. І галоўны аргумент тых, хто так робіць: мне ногі не муляе. Аднак шкарпэткі пад шлёпанцы заўсёды выглядаюць недарэчна, я так не раблю — і вам не раю».