Два чалавекі загінулі ў Францыі, калі святкавалі перамогу зборнай
16.07.2018 / 17:47
Перамога зборнай Францыі на чэмпіянаце свету выклікала шквал весялосці па ўсёй краіне. У гарадах і мястэчках сотні тысяч людзей выйшлі на вуліцы, масавыя гулянні працягваліся да раніцы.
На жаль, не абышлося без беспарадкаў і трагічных інцыдэнтаў.
На ўсходзе Францыі 50-гадовы жыхар горада Ансі не стрымаў эмоцый пасля фінальнага свістка, нырнуў з радасці ў неглыбокі канал, зламаў шыю і памёр.
У мястэчку Сэн-Фелікс на поўначы краіны 30-гадовы малады чалавек, святкуючы перамогу сваёй зборнай, урэзаўся на аўтамабілі ў дрэва і памёр ад атрыманых траўм.
Яшчэ адна францужанка знаходзіцца ў крытычным стане. Яна ўпала пад колы трактара, на якім раз'язджала з сябрамі, адзначаючы перамогу нацыянальнай каманды.