Міліцыя правяла рэйд на «Ждановічах»: затрымалі 90 чалавек ФОТА
21.10.2018 / 14:54
Па выніках рэйду на тэрыторыі гандлёвага дома «Ждановічы» міліцыя затрымала 90 чалавек, паведаміла 21 кастрычніка афіцыйны прадстаўнік Цэнтральнага РУУС г.Мінска Алена Свірыдава.
У дачыненні да затрыманых склалі 42 адміністрацыйныя пратаколы з якіх: 31 — за распіццё алкаголю, спажыванне наркатычных сродкаў або з'яўленне ў грамадскім месцы ў стане ап'янення, 9 — за непадпарадкаванне службовай асобе пры выкананні ім службовых паўнамоцтваў, 2 — за дробнае хуліганства.
Пры гэтым да адміністрацыйнай адказнасці прыцягнуты 71 ўдзельнік дарожнага руху.
У ходзе праверкі на прадмет легальнасці знаходжання на тэрыторыі Рэспублікі Беларусь праверана 28 замежных грамадзян. Па выніках праведзенай работы 5 замежнікаў прыцягнутыя да адміністрацыйнай адказнасці за парушэнне заканадаўства аб прававым становішчы замежных грамадзян у Рэспубліцы Беларусь.
У Цэнтр ізаляцыі правапарушальнікаў ГУУС Мінгарвыканкама накіраваныя 10 чалавек.