Беларусь палічыць памер кампенсацыі за брудную нафту пасля капрамонту НПЗ
10.10.2019 / 13:54
Беларусь палічыць памер кампенсацыі з-за паставак няякаснай нафты з Расіі пасля завяршэння ў лістападзе капрамонту сваіх нафтаперапрацоўчых заводаў.
Пра гэта паведаміў сёння журналістам намеснік старшыні канцэрна «Белнафтахім» Андрэй Бунакоў у Палаце прадстаўнікоў, перадае БЕЛТА.
«Канчатковая сума кампенсацыі будзе палічаная пасля капітальнага рамонту нашых нафтаперапрацоўчых заводаў. Калі на «Нафтане» капрамонт завяршаецца, то дзесьці ў пачатку лістапада ён будзе скончаны на Мазырскім НПЗ, які непасрэдна перапрацоўваў брудную нафту. Пасля гэтага будзе палічаная канчатковая сума», — сказаў Андрэй Бунакоў.
Намеснік старшыні «Белнафтахіма» не выключыў, што сума кампенсацыі можа ўключаць і недаатрыманы прыбытак за транзіт нафты.
Пры гэтым ён не ўдакладніў, якую суму для кампенсацыі можа назваць беларускі бок.