Кангрэс ЗША павысіў узрост куплі цыгарэт да 21 года
20.12.2019 / 14:02
Кангрэс ЗША павысіў мінімальны ўзрост набыцця тытунёвых вырабаў і электронных цыгарэт з 18 да 21 года, піша РБК.
Гэтая мера ўключана ў новы дзяржбюджэт, які ў чацвер 19 снежня ўхваліў сенат. Калі прэзідэнт краіны Дональд Трамп падпіша бюджэт, ён стане законам. Новыя правілы пачнуць дзейнічаць у верасні 2020 года.
WSJ паведамляе, што буйныя тытунёвыя кампаніі Altria Group і Reynolds American Inc., а таксама вытворца электронных цыгарэт Juul Labs падтрымалі гэтае рашэнне.
Узроставы парог для набыцця тытунёвых вырабаў у 21 год быў раней усталяваны на мясцовым узроўні ў 19 штатах, уключаючы Нью-Ёрк, Каліфорнію і Тэхас. Аднак па нормах дзеючага федэральнага заканадаўства мінімальны ўзрост для такіх пакупак — 18 гадоў.