Simańjan pachvaliłasia pośpiechami biełaruskaha «Sputnika». I heta absalutnaja chłuśnia
05.02.2020 / 20:16
Hałoŭny redaktar Russia Today, infarmacyjnych ahienctvaŭ «Rossija siehodnia» i «Sputnik» Marharyta Simańjan pachvaliłasia pośpiechami biełaruskaha «Sputnika».
«U Sputnik Biełaruś u studzieni 10 miljonaŭ unikalnych karystalnikaŭ pry nasielnictvie krainy 9,5 miljona. Heta bolš, čym u «Radyjo Svaboda», polskaha «Biełsata» i astatnich zamiežnych SMI ŭ krainie, razam uziatych. Hanarusia!»
— napisała ŭ svaim telehram-kanale rasijskaja prapahandystka.
Niaŭžo toje, što jana napisała, praŭda, i «Sputnik» lidziruje na biełaruskim infarmacyjnym rynku? Naturalna, nie.
U internecie jość vialikaje mnostva ličylnikaŭ papularnaści sajtaŭ. I ŭsie jany pakazvajuć padobnyja ličby naviedvalnaści «Sputnika».
Servis Liveinternet prapanuje acanić kolkaść naviednikaŭ na sajtych za apošni 31 dzień. Heta nie zusim «čysty» studzień, ale amal toj samy pieryjad.
U «Sputnika» naličyłasia 2,7 miljona ŭnikalnych naviednikaŭ. Ale tolki 30% čytačoŭ sajta — žychary Biełarusi.
Tut.by, Onliner.by, «Naša Niva» i mnohija inšyja biełaruskija resursy nie stavili sabie hety rasijski ličylnik.
Servis Similarweb prapanuje statystyku za apošnija 28 dzion. Jon padličvaje kolkaść vizitaŭ (sieansaŭ). Heta ličba aznačaje, kolki razoŭ niechta zachodziŭ na sajt. Kali čałaviek za miesiac zajšoŭ z mabilnika na «Sputnik» piać razoŭ, to budzie ŭličvacca adzin karystalnik i piać vizitaŭ.
Dyk voś, u biełaruskaha «Sputnika» naličyłasia 10,21 miljona vizitaŭ.
Nie karystalnikaŭ, a vizitaŭ! Atrymlivajecca, što kiraŭnica «Sputnika» Marharyta Simańjan nie razumieje roźnicy pamiž hetymi terminami.
Źvierniem uvahu i na jakaść aŭdytoryi. Siaredni vizit na sajt praciahvajecca 1 chvilinu i 4 siekundy, ale bolš za 70% naviednikaŭ vychodziać z sajta adrazu ž, nie pierachodziačy na inšyja staronki. Heta aznačaje, što ŭ «Sputnika» nie stałaja aŭdytoryja, a zalotnaja, jakaja traplaje pa peŭnych spasyłkach, ale adrazu ž sychodzić.
Što da rehijonu, to Similarweb padličvaje statystyku pa naviedvańniach tolki z kampjutaraŭ (biez mabilnych pryładaŭ). U «Sputnika» tolki 16% karystalnikaŭ z Biełarusi, zatoje z Rasii — ažno 75%.
Dla paraŭnańnia, u «Našaj Nivy» 85% naviednikaŭ z Biełarusi.
Jašče adzin servis, «Jandeks-Radar», publikuje pakazčyki tolki rasijskich sajtaŭ. I biełaruski «Sputnik», naturalna, identyfikujecca sistemaj jak «svoj», jak, darečy, i «Sovietskaja Biełorussija».
Siarod SMI biełaruski «Sputnik» zmahajecca z «Kaśpijskimi navinami» i roznymi «Navinami Sierpuchava»
U studzieni kolkaść karystalnikaŭ z Biełarusi ŭ biełaruskaha «Sputnika» składała kala 800 tysiač čałaviek. Praŭda, pra heta Marharyta Simańjan nie kaža.
U hetym i jość «pośpiech» pracy «Sputnika» i «Sovietskaj Biełorussii» ŭ internecie. Ich dekłaravanaja meta — raspaŭsiud infarmacyi dla biełaruskaha spažyŭca.
Ale ŭ realnaści, nie daciahvajučysia da zhadanych vyšej Tut.by, Onliner.by, «Našaj Nivy», jany aryjentujucca na inšy šlach — pasprabavać dasiahnuć vysokich ličbaŭ za košt vypadkovaha traplańnia ŭ rekamiendacyjnyja sistemy da rasijskaha spažyŭca.