Дырэктарка дома састарэлых расказала, якія меры прынятыя, каб не дапусціць заражэння пацыентаў каранавірусам
У групе рызыкі захворвання каранавірусам і ўскладненняў ад яго — пажылыя. Для дамоў састарэлых Мінздароўя выдала рэкамендацыі. Пра іх «Нашай Ніве» расказала дырэктарка Рэспубліканскага інтэрната для ветэранаў вайны і працы Людміла Шарай.
13.03.2020 / 12:59
Ілюстрацыйны здымак. Фота Надзеі Бужан
Ва ўстановах адмянілі ўсе масавыя мерапрыемствы — канцэрты, сутрэчы. Скарацілі візіты сваякоў.
«Афіцыйны каранцін мы не ўводзілі, але часткова абмежавалі доступ у інтэрнат. Асабліва калі хтосьці са сваякоў прыехаў з-за мяжы, мы просім не наведваць.
Нічога незвычайнага. Мы не школа, не крама — мы дастаткова закрытая ўстанова», — кажа Людміла Шарай.
Выхад саміх пастаяльцаў з установы не забаронены, але ў такой меры, заўважаюць, няма патрэбы. Сярэдні ўзрост жыхароў інтэрната — 94 гады, мала хто з іх здольны на доўгія шпацыры.
У цэлым меры амаль такія ж, як і пры эпідэміі грыпу.
«У харчаванне часнык дадаецца, вітамінізацыя праводзіцца, як і пры любой іншай інфекцыі», — дадае дырэктарка ўстановы.
У пакоях праводзяць кварцаванне. Падлогі мыюцца дэзінфекуючымі сродкамі, ручкі праціраюцца па два-тры разы на дзень. На ўваходзе вісяць антысэптыкі.
У медыкаў, што працуюць у інтэрнаце, масачны рэжым.