Кіраўніка філіяла «Белгазпрамбанка» ў Магілёве абвінавачваюць у крадзяжы ў асабліва буйным памеры
14.06.2020 / 08:25
У дачыненні да кіраўніка Магілёўскай абласной дырэкцыі Белгазпрамбанка Сяргея Кармызава распачата крымінальная справа, паведамляе БТ-1. Яго абвінавачваюць у крадзяжы ў асабліва буйным памеры.
Гаворка ідзе пра маніпуляцыі з выдачай банкаўскіх крэдытаў, гэта значыць, фактычна, аб іх продажы. Адзначаецца, што пацярпелыя ацанілі шкоду «ў дзясяткі тысяч даляраў». Іншыя падрабязнасці тэлеканал не прывёў.
Кармызаў — сябра ініцыятыўнай групы Віктара Бабарыкі. З сярэдзіны 2000 года да мая 2020 года Бабарыка ўзначальваў Белгазпрамбанк.
Кармызава затрымалі 12 чэрвеня разам з каардынатарам ініцыятыўнай групы Віктара Бабарыкі па Магілёўскай вобласці Уладзімірам Дударавым.