Razłučanuju karanavirusam paru švieda i rasijanki vyratavała dziejnaja luteranskaja kircha ŭ Hrodnie
Kranalnaj historyjaj sa ščaślivym finałam padzialiłasia «Kamsamolskaja praŭda».
25.07.2020 / 11:07
Rasijanka Ksienija i jaje vybrańnik Krystafier nie bačylisia amal čatyry miesiacy. Ich pieršaja sustreča z pačatku pandemii karanavirusa adbyłasia 11 lipienia ŭ Biełarusi.
Ksienija i jaje vybrańnik Krystafier. Fota: asabisty archiŭ.
— Z Krystafieram my paznajomilisia ŭ Tajłandzie, dzie i ja, i jon zimavali. I voś hetaj zimoj my taksama adpravilisia na zimoŭku ŭ Tajłand, a ŭvieś čas žyli ŭ Šviecyi. I płanavali lacieć u Šviecyju razam 26 krasavika. Ale Krystafieru treba było terminova źlatać tudy pa pracy, i jon vylecieŭ 26 sakavika, a 8 krasavika pavinien byŭ viarnucca. Ale nie atrymałasia: miežy začynili, — raspaviadaje «Kamsamołcy» Ksienija.
Z tych časoŭ dziaŭčyna čakała adkryćcia miežaŭ, i jak tolki Šviecyja dazvoliła ŭjazdžać na svaju terytoryju, Ksienija adrazu ž kupiła kvitki na samalot.
— Palot byŭ taki: Pchukiet — Banhkok — Chielsinki — Stakholm. Ale padčas pieralotaŭ avijakampanija pasadziła mianie na rejs da Finlandyi tolki z umovaj kupli kvitka da Minska. Adtul u mianie byŭ kvitok da Stakholma, ale i tam mnie admovili ŭ pasadcy na rejs sa spasyłkaj na ŭnutranyja praviły avijakampanii, — kaža Ksienija.
U vyniku, kab patrapić u Šviecyju, dziaŭčynie treba było stać žonkaj Krystafiera.
— My i płanavali raśpisacca ŭ krasaviku pa prylocie ŭ Šviecyju. Ale pandemija ŭsio pieraviarnuła z noh na hałavu, i nam daviałosia šukać vyjście. Sustrecca my mahli tolki ŭ Biełarusi, dzie niama karancinu. A kab Šviecyja pryznała šlub aficyjnym, nam treba było abviančacca ŭ luteranskaj kirsie. Zadača była nie z prostych, — uśmichajecca Ksienija.
Zakachanym i praŭda pašancavała… u Biełarusi jość tolki adna dziejnaja luteranskaja carkva — kircha znachodzicca ŭ Hrodnie.
Viančańnie Krystafiera i Ksienii ŭ kirsie ŭ Hrodnie. Fota: asabisty archiŭ.
— Na ščaście, pastar Uładzimir Tatarnikaŭ adkazaŭ na moj elektronny list — jamu taksama napisaŭ Krystafier, jaki luteranin, — i pahadziŭsia nas abviančać. I my kupili kvitki ŭ Minsk. Šviecyja pryznaje šluby, zaklučanyja ŭ luteranskaj carkvie, aficyjnymi. Ale ŭsio roŭna treba zrabić siakija-takija pracedury pa lehalizacyi ŭ Šviecyi. A ŭžo paśla treba budzie lehalizavać naš šlub i ŭ Rasii na padstavie šviedskich dakumientaŭ, — radujecca dziaŭčyna.