Tłumačym, što nie tak sa zvarotam «2500 spartśmienaŭ» u padtrymku Łukašenki
02.12.2020 / 21:57
Vialiki šum narabiŭ kalektyŭny zvarot spartśmienaŭ u padtrymku kiraŭnika Biełarusi Alaksandra Łukašenki. Arhanizatary śćviardžajuć, što pad im padpisałasia až 2500 čałaviek.
Sprava ŭ tym, što adrazu paśla vybaraŭ z’iaviŭsia list spartśmienaŭ, jakija vystupali za novyja vybary biez Łukašenki, a taksama za spynieńnie hvałtu i rasśledavańnie ŭsich faktaŭ źbićcia ludziej. Jaho padpisała bolš za 1000 čałaviek, u tym liku sapraŭdy znakavyja spartśmieny: frystajlisty Kazieka, Huśkova, Ramanoŭskaja, baskietbalistki Leŭčanka, Kul i Snycina, futbalisty Tumiłovič, Štaniuk, Chamutoŭski, płyŭčycha Hierasimienia, lohkaatlet Kraŭčanka i mnohija inšyja. Nichto ich nie padbiŭ da hetaha, usio išło znutry ad samich spartśmienaŭ, jakija nie mirylisia z toj niespraviadlivaściu, što bačyli na svaje vočy.
Ciapier ža ŭłada adkazała svaim listom. Pasprabujem patłumačyć, čamu z dadzienaj inicyjatyvaj nie ŭsio hładka.
Tankist Uładzimir Bazanaŭ, jaki niezrazumieła čamu kiruje Biełaruskaj fiederaciaj futboła, u liście padpisany jak «kandydat u majstry sportu pa lohkaj atletycy»
Chto padpisaŭ z viadomych?
Pieršym u śpisie idzie alimpijski čempijon pa viesłavańni Alaksandr Masiejkaŭ. Praŭda, čamuści nie paznačana, što hety čałaviek z’iaŭlajecca deputatam Pałaty pradstaŭnikoŭ pa Mahiloŭskaj Pramysłovaj akruzie. Prosta tak u parłamient u nas nichto nie traplaje.
Padpisałasia słavutaja viaślarka Kaciaryna Karsten, jakaja doŭhi čas žyła ŭ Niamieččynie. Šturchalnica jadra Janina Karolčyk-Pravalinskaja, jana kaliści była tvaram «Sovietskoj Biełorussii», a paśla jaje złavili na ŭžyvańni dopinhu. Na dopinhu łavili i kidalnika mołata Ivana Cichana, jaki ciapier uznačalvaje fiederacyju lohkaj atletyki. Paśla vybaraŭ Łukašenka staviŭ Cichana ŭ prykład inšym spartśmienam, jakija jamu «zdradzili».
Siarod padpisantaŭ jość tytułavanyja ŭ minułym Alaksandr Miadźviedź (volnaja baraćba), Elina Źvierava (kidańnie dysku), handbalisty Andrej Barbašynski i Alaksandr Karšakievič.
Šmat chto ździviŭsia ŭbačyć podpis alimpijskaha čempijona ŭ frystajle Antona Kušnira — heta ŭ toj momant, kali nastaŭnik frystajlistaŭ Mikałaj Kazieka, a taksama amal usia zbornaja vystupaje suprać hvałtu i za novyja vybary.
Aproč jaho, z sučasnych viadomych spartśmienaŭ udałosia rekrutavać tenisistku Arynu Sabalenku i batucista Uładzisłava Hančarova. Nie tak i šmat.
Što z futbalistami?
Samaje viadomaje proźvišča ŭ śpisie — heta były paŭabaronca zbornaj Biełarusi Uładzimir Karyćka, jaki ciapier pracuje pry Biełaruskaj fiederacyi futboła. Bolš nijakich značnych proźviščaŭ tam niama. Jość jašče biurakraty z fiederacyi — naprykład, Juryj Viarhiejčyk. A voś kiraŭnik ABFF tankist Uładzimir Bazanaŭ padpisaŭsia jak «kandydat u majstry sportu pa lohkaj atletycy».
Niekalki futbalistaŭ, jakija akazalisia ŭ śpisie, rašuča admaŭlajuć, što niešta padpisvali. Naprykład, abaronca mahiloŭskaha «Dniapra» Iłla Udodaŭ u razmovie z karespandentam «NN» skazaŭ, što pačuŭ pra zvarot ad brata, jaki ŭsturbavany pazvaniŭ jamu rankam. Jašče adzin «dniaproviec» Jaŭhien Jelizaranka ŭ razmovie z «Trybunaj» taksama klaŭsia, što ničoha nie padpisvaŭ.
Usio taja ž «Trybuna» vyśvietliła, što zvarot z prośbaj padpisacca pryjšoŭ va ŭsie futbolnyja kłuby krainy. Ale faktyčna paŭsiul ich pasłali. Bazanaŭ nibyta asabista zvaniŭ u BATE, ale nijakich vynikaŭ tak i nie dabiŭsia.
Što chakieisty?
Viadoma, što aŭtohraf pakinuŭ siabra Łukašenki, trenier nacyjanalnaj zbornaj Michaił Zacharaŭ. Niebłahija ŭ minułym hulcy Andrej Kavaloŭ i Jaŭhien Jesaŭłaŭ. Nibyta jość u śpisie były hulec NChŁ Kanstancin Kalcoŭ, jakoha apošnim časam časta bačać z Arynaj Sabalenkaj, ale znajści jaho imia nie atrymałasia.
Niama podpisaŭ dziejnych hulcoŭ minskaha «Dynama», fłahmana našaha chakieja. Zatoje amal u poŭnym składzie z’iavilisia podpisy hulcoŭ ChK «Lida» i ChK «Bresta». Pryčym navat niepaŭnaletnich. Z niepaŭnaletnimi — heta nie adzinkavaja historyja. Toje samaje adbyłosia z maładymi baskietbalistkami z Hrodna. Zdajecca, nichto navat nie sprabavaŭ zabivać sabie hałavu vieryfikacyjaj.
Skazać, što chakieisty padpisalisia masava, taksama zusim nie vypadaje.
Jakija vidy sportu pradstaŭleny najbolš?
Naprykład, mastackaja himnastyka. Tam jość pryziorka alimpijskich hulniaŭ Ksienija Sankovič, miedalistka čempijanataŭ śvietu Kaciaryna Hałkina i mnohija inšyja. Šmat aŭtohrafaŭ ad spartśmienaŭ, jakija vystupajuć u datacyjnych ad dziaržavy vidach sportu, ale nijakimi pośpiechami pachvalicca nie mohuć zusim. Heta i šort-trek, i vodnaje poła, i hornyja łyžy. Mabyć, nie ŭsie navat viedajuć, što ŭ Biełarusi niechta na prafiesijnaj asnovie zajmajecca hetym.
Što jašče z aniekdatyčnaha?
Čynoŭniki Śvietłahorskaha rajvykankama ŭspomnili ŭsie vidy sportu, jakimi, mabyć, kaliści zajmalisia ŭ dziacinstvie ci junactvie, kab i ich proźvišča śviacilisia ŭ hetym śpisie. Načalnik upraŭleńnia sielskaj haspadarki Artur Stralec padpisaŭsia «futbalistam», a načalnik addzieła ekanomiki Uładzisłaŭ Patapienka — «tenisistam».
Nu i ŭvohule achajnaści ŭ hetym śpisie asabliva niama. Skažam, niechta Ivan Babko padpisany «futbalistam», ale ŭ tłumačeńniach idzie, što jon pryzior čempijanatu Biełarusi pa hreka-rymskaj baraćbie.Ci «viaślarka» Taćciana Sabaleŭskaja — pryziorka čempijanatu BSSR pa lohkaj atletycy. I takich prykładaŭ dziasiatki.
Baćki i dzieci
My ŭžo pisali, što ŭ śpisie z’iaviłasia Valancina Ščerba, mama šaścirazovaha alimpijskaha čempijona ŭ spartyŭnaj himnastycy Vitala Ščerby. Valancina Mikałajeŭna šmat kaho šakavała svaimi pryznańniami, što «ranicaj i viečaram» molicca na partret Alaksandra Łukašenki. Sam Vital pryniaŭ rašeńnie zastavacca «pa-za palitykaj».
Hladzi taksama: 73-hadovaja mama Vitala Ščerby padpisała zvarot spartśmienaŭ: Ja malusia na partret Łukašenki rankam i viečaram
Jość u śpisie skakun u vyšyniu Maksim Niedasiekaŭ, a da jaho dałučylisia tata i mama, jakija taksama kaliści zajmalisia lohkaj atletykaj.
Vidavočna, što list stvarali na chutkuju ruku. Hałoŭnym dla stvaralnikaŭ była masavasać, a nie vyvieranyja źviestki ci sapraŭdnaść podpisaŭ. Šmat kaho zapisvali prosta za kampaniju, navat nie staviačy ŭ viadomaść. Trecija padpisvajucca, pieražyvajučy za pracu. Mnohija spartśmieny admaŭlajucca kamientavać svoj «vybar», jak batucist Uładzisłaŭ Hančaroŭ. Mabyć, dumajuć, što «ŭsie i tak usio razumiejuć».