Кіраўнік НАТА заклікаў Мінск і Маскву паважаць правы беларускіх грамадзян
03.12.2020 / 07:39
Паўночнаатлантычная рада на ўзроўні кіраўнікоў МЗС абмеркавала сітуацыю ў Беларусі і заклікала Мінск і Маскву «паважаць правы беларускіх грамадзян». Пра гэта заявіў у сераду генеральны сакратар НАТА Енс Столтэнберг па выніках апошняй у гэтым годзе відэаканферэнцыі кіраўнікоў МЗС НАТА.
«Міністры абмяркоўвалі сітуацыю ў Беларусі, а таксама ў Нагорным Карабаху. І Мінск, і Масква павінны паважаць дэмакратычныя правы беларускіх грамадзян на вызначэнне ўласнай будучыні і на ўсёабдымны палітычны дыялог», — заявіў ён.
Столтэнберг ніяк не пракаментаваў заяву Аляксандра Лукашэнкі, які раней у сераду на Саміце лідараў краін АДКБ абвінаваціў НАТА ў стварэнні ваеннай групоўкі для захопу заходніх беларускіх зямель.