У Мінску матацыкліст-бяспраўнік сыходзіў ад пагоні ДАІ на хуткасці больш за 200 км/г
У Мінску мужчына на матацыкле Suzuki спрабаваў сысці ад пераследу ДАІ. Парушальніка дагналі — аказалася, у яго няма правоў, паведамілі ў сталічнай ДАІ.
12.05.2021 / 21:13
Інцыдэнт адбыўся познім вечарам 11 мая. Каля 23:45 на скрыжаванні МКАД з пр. Незалежнасці матацыкліст паспрабаваў уцячы. Пачаўся пераслед.
Парушальнік працягваў рухацца па вонкавым кальцы МКАД у кірунку Лагойскага тракту з хуткасцю больш за 200 км/г.
На 16 км Слуцкай шашы кіроўцу ўдалося затрымаць. Дарэчы, з ім быў яшчэ пасажыр. Як высветлілася, ад пагоні спрабаваў сысці 21-гадовы мінчук, які не мае правоў. Па словах затрыманага, у гэтым і была прычына, чаму ён не хацеў спыняцца.
Маладога чалавека даставілі ў Першамайскае РУУС Мінска.