Блізкім палітвязня Ашурка яшчэ не выдалі яго цела

Блізкім палітвязня Вітольда Ашурка, які памёр у шклоўскай калоніі, яшчэ не выдалі яго цела. 

24.05.2021 / 14:55

«Сёння раніцай сям’я датэлефанавалася ў Магілёўскі СК. Там адказалі, што эксперты павінны даць заключэнне аб выпадку, і пасля яны ўжо самі набяруць і скажуць, калі цела можна забраць. Сёння ўжо наўрад ці паедзем, нават калі дадуць дазвол: з Бярозаўкі да Магілёва дабірацца 4 гадзіны, не паспеем да канца працоўнага дня», — кажа сябра сям’і Сяргей Пантус.

Па яго словах, пахаванне будзе на радзіме Вітольда, у Бярозаўцы, на наступны дзень, як забяруць цела.

Вітольду Ашурку было 50 год. На закрытым судзе ў Лідзе яму далі 5 год калоніі агульнага рэжыму (па артыкулах 342 і 364 — дзеянні, якія груба парушаюць грамадскі парадак, і гвалт або пагроза яго прымянення ў дачыненні да супрацоўнікаў унутраных органаў). Прычынай смерці палітвязня называюць спыненне сэрца.

У шклоўскай калоніі памёр 50-гадовы палітвязень Вітольд Ашурак

Nashaniva.com