Kandydatka ŭ kanclery Hiermanii ad «zialonych» zaklikała pašyryć sankcyi suprać Minska za košt naftavaha siektara
Sankcyi suprać Biełarusi paśla zachopu łajniera Ryanair i zatrymańnia Ramana Pratasieviča nieabchodna raspaŭsiudzić na naftavy siektar krainy, upeŭnienaja Analena Bierbok. Jana zaklikaje taksama spynić «Paŭnočny patok — 2», piša DW.
31.05.2021 / 12:36
Kandydatka na pasadu kanclera Hiermanii ad partyi «Sajuz-90/«Zialonyja» Analena Bierbok (Annalena Baerbock) zaklikała pašyryć sankcyi ES suprać biełaruskich uładaŭ u suviazi z zachopam samalota Ryanair i zatrymańniem Ramana Pratasieviča. Jana zajaviła ab nieabchodnaści ŭvieści štrafnyja miery ŭ dačynieńni da naftavaj haliny Biełarusi.
«Naftavy biznes źjaŭlajecca najvažniejšaj krynicaj. Tamu ŭ pieršuju čarhu nieabchodna raspaŭsiudzić sankcyi, jakija ciapier nakiravanyja na asobnych ludziej, na naftavyja apieracyi», — adznačyła jana. Razam z tym Bierbok padkreśliła, što režym Alaksandra Łukašenki ŭtrymlivajecca, pierš za ŭsio, «za košt padtrymki Kramla». Tamu prajekt budaŭnictva hazapravoda «Paŭnočny patok — 2» źjaŭlajecca «takim centralnym hieapalityčnym pytańniem», adznačyła jana dalej.
Adnačasova lidarka «zialonych» abvinavaciła ŭrad Hiermanii ŭ dvajnoj stratehii ŭ dačynieńni da Ukrainy. «Z adnaho boku, jany kažuć, što padtrymlivajuć sankcyi Jeŭrapiejskaha Sajuza, ź inšaha boku, fiederalny ŭrad padtrymlivaje hazapravod «Paŭnočny patok — 2», jaki mienavita hetyja sankcyi pierakreślivaje», — zajaviła jana i zaklikała da admovy ad PP-2, žorstkaha kursu ŭ dačynieńni da Rasii, ale praciahu dyjałoha.