Kansiervatyŭnaha rabina, prychilnika Łukašenki, asudzili da 6 sutak za «pikiet suprać vakcynacyi»
Naziralniki z pravaabarončaha centra «Viasna» paviedamlajuć, što da šaści sutak administracyjnaha aryštu asudžany rabin Ihael Jehudzi.
30.07.2021 / 16:09
Sprava ŭ tym, što hramadzianin Izraila išoŭ pa praśpiekcie Niezaležnaści ŭ majcy «Suprać hvałtoŭnaj vakcynacyi». Heta paličyli pikietam.
Na sudzie Jehudzi zajaviŭ, što na Akreścina jamu skazali ab adsutnaści lubych pravoŭ, nie aznajomili z materyjałami spravy i nie dali pazvanić advakatu. Na sudzie mužčyna kazaŭ, što źjaŭlajecca prychilnikam Łukašenki.
Rabi Jehudzi 60 hadoŭ. Jon rodam ź Minska. Ale ŭ 19-hadovym uzroście pierajechaŭ u Izrail, dzie pražyŭ 30 hadoŭ. Nazad u Biełaruś jon viarnuŭsia ŭ 2010 hodzie. U Izraili ŭ jaho zastalisia dzieci i ŭnuki. Jehudzi — chasid, pazicyjanuje siabie jak pradstaŭnik lubavickaj płyni. «Kali b u mianie spytali, jak pavinna vyhladać prystojnaja dziaržava, to ja b skazaŭ: jak Biełaruś», — kazaŭ Jehudzi.
Jon šmat krytykuje siońniašni zachodni śviet, demakratyju, libieralizm, ale najbolš kranajuć pytańni hiendaru. Apošnim časam Jehudzi staŭ zaŭvažnym «kavid-dysidentam», admaŭlaŭ nie tolki karanavirus, ale i vakcynacyju ad jaho. U svaich sacyjalnych sietkach časam z matam piša ab apanientach Łukašenki. Jak pazaštatnik supracoŭničaŭ z hazietaj «Viačerni Mahiloŭ», viadomaj svaimi antydemakratyčnymi pohladami.