CNN: 9 žniŭnia ZŠA abjaviać pra novyja sankcyi ŭ dačynieńni da Biełarusi
Amierykanski telekanał CNN paviedamlaje, što ŭ paniadziełak, 9 žniŭnia, administracyja prezidenta Džo Bajdena apublikuje novyja sankcyi ŭ dačynieńni da Biełarusi.
07.08.2021 / 09:37
Krynica ŭ Kanhresie paviedamiła CNN, što ŭviadzieńnie novych sankcyj budzie prymierkavana da hadaviny z dnia vybaraŭ u Biełarusi, vyniki jakich mižnarodnaja supolnaść nie pryznała.
Pakul nieviadoma, na što buduć nakiravanyja novyja sankcyi, ale Śviatłana Cichanoŭskaja paśla vizitu ŭ Vašynhton zajaŭlała, što jana pieradała administracyi Bajdena kankretny śpis metaŭ, jakija jaje kamanda chacieła b bačyć pad sankcyjami.
U hetym śpisie znachodzicca šerah kampanij, jakija manapalizavanyja režymam Łukašenki i jaho nabližanymi, uklučajučy kalijnuju kampaniju «Biełaruśkalij», a taksama naftavyja, drevaapracoŭčyja i mietałurhičnyja pradpryjemstvy.
Cichanoŭskaja na hetym tydni zaklikała mižnarodnuju supolnaść «pasłać sihnał salidarnaści ź biełarusami, jakija zmahajucca za demakratyju i svabodu», mienavita 9 žniŭnia, u hadavinu sprečnych vybaraŭ, jakija vyklikali masavyja pratesty pa ŭsioj Biełarusi.
Ambasadar ZŠA ŭ Biełarusi Džuli Fišer zajaviła zakanadaŭcam Sienata ŭ pačatku červienia, što administracyja «skancentravanaja na novym vykanaŭčym ukazie ŭ samyja karotkija mahčymyja terminy».