Łukašenka ŭnios u parłamient zakon ab spynieńni damoŭlenaściaŭ pa readmisii ź JeS. Što budzie z koštami na vizy i ź mihrantami?
Łukašenka ŭnios u parłamient zakonaprajekt «Ab prypynieńni dziejańnia pahadnieńnia pamiž Respublikaj Biełaruś i JeS ab readmisii asob, jakija znachodziacca biez dazvołu». Hetaja damova prymałasia ŭ pakiecie z damovaj ab źnižeńni koštaŭ na šenhienskija vizy dla biełarusaŭ. Paśla jaje zamarozki niezrazumieła, što budzie ź vizami i ź mihrantami.
08.09.2021 / 15:10
baldnews.lt
Paviedamlajecca, što dakumient padrychtavany ŭ ramkach mier u adkaz na «niedružalubnyja dziejańni, pryniatyja JeS i jaho dziaržavami-siabrami ŭ dačynieńni da Biełarusi».
Pahadnieńnie vyznačała miechanizm pieradačy, pryniaćcia i viartańnia asob, jakija parušyli ŭmovy ŭjezdu, znachodžańnia i pražyvańnia. U najbližejšy čas adpaviednyja abaviazacielstvy aficyjnym Minskam buduć zamarožanyja. Paviedamlajecca, što takoje prypynieńnie Biełaruś ažyćciaŭlaje ŭ adpaviednaści ź mižnarodnym pravam.
Readmisija — heta zhoda dziaržavy pryniać nazad svaich hramadzian abo zamiežnikaŭ, jakija znachodzilisia na terytoryi krainy, jakija padlahajuć departacyi ź inšaj dziaržavy.
***
Upieršyniu ab prypynieńni pahadnieńnia było zajaŭlena ŭ kancy červienia. Tady biełaruskaje MZS paviedamiła ab tym, što pačynaje realizacyju pracedury prypynieńnia dziejańnia pahadnieńnia ab readmisii ź JeS.
«My nie možam vykonvać svaje abaviazacielstvy ŭ ramkach hetaha pahadnieńnia va ŭmovach uviedzienych Jeŭrasajuzam sankcyj i abmiežavańniaŭ <…>. Prypynieńnie dziejańnia pahadnieńnia niehatyŭna adabjecca na ŭzajemadziejańni ź JeS u sfiery baraćby ź nielehalnaj mihracyjaj i arhanizavanaj złačynnaściu», — kazałasia ŭ paviedamleńni MZS.
Varta zaznačyć, što adno z nastupstvaŭ admovy ad pahadnieńnia — heta mahčymaje padaražeńnie šenhienskaj vizy z 35 da 80 jeŭra, adnak, jak kamientavała ŭ kancy červienia pres-sakratar zamiežnapalityčnaj słužby JeS Nabiła Masrali, na košt šenhienskich vizaŭ, heta nie paŭpłyvaje:
«Rašeńnie ab prypynieńni dziejańnia pahadnieńnia ab readmisii nie aznačaje aŭtamatyčnaha prypynieńnia dziejańnia pahadnieńnia ab spraščeńni vizavaha režymu pamiž JeS i Biełarussiu ŭ adpaviednaści z artykułam ab prypynieńni vizavaha režymu», — kazała pres-sakratar.