Eks-kiraŭnika Katałonii Pučdemona aryštavali ŭ Italii
Ułady Italii ŭviečary ŭ čacvier aryštavali byłoha kiraŭnika Katałonii Karłasa Pučdemona, jaki chavajecca ad pravasuddzia Ispanii z vosieni 2017 hoda. Jaho zatrymali ŭ vobłaści Sardzinija, kudy jon pryjechaŭ na fiestyval.
24.09.2021 / 08:11
ABC
«Pučdemon byŭ zatrymany pa pryjeździe ŭ Sardziniju, kudy prybyŭ u jakaści jeŭradeputata. Heta zatrymańnie zasnavana na rasparadžeńni Viarchoŭnaha suda Ispanii ad 14 kastryčnika 2019 hoda [mižnarodny ordar na aryšt], jakoje zakanadaŭča było prypyniena pastanovaj Suda JeS», — paznačana ŭ zajavie advakata.
Pučdemon prybyŭ na vostraŭ Sardziniju na falkłornaje śviata katałonskaj kultury «Adzifołk».
U Alhiera, dzie prachodzić fiestyval, čakalisia kiraŭnik parłamienta Katałonii Łaura Baras i Pučdemon, a taksama jašče ceły šerah pradstaŭnikoŭ palityčnaj elity Katałonii. Adkryvacca mierapryjemstva pavinna było ŭ miascovym teatry ŭviečary 24 vieraśnia.
Pučdemon byŭ zatrymany ŭ aeraporcie Alhiera, a ciapier były kiraŭnik Katałonii znachodzicca ŭ turmie horada Sasary.
Jak paviedamlajecca, katałonski palityk užo ŭ piatnicu paŭstanie pierad miascovym apielacyjnym sudom. Pa zvyčajnaj praktycy, na pieršym pasiadžeńni ŭ zatrymanaha pytajucca, ci zhodny jon na ekstradycyju. U vypadku admovy pačynajecca razhlad dakumientaŭ, na padstavie čaho prymajecca rašeńnie ab ekstradycyi, jakoje moža być asprečana ŭ vyšejšych instancyjach. Na hety čas sud vyznačaje mieru strymańnia zatrymanamu.
Palityk uznačalvaŭ urad Katałonii ŭ momant praviadzieńnia tam refierendumu ab niezaležnaści 2017 hoda. Nieŭzabavie paśla hetaha jon źjechaŭ u Bielhiju. Sudovyja ŭłady Ispanii damahajucca jaho vydačy pa abvinavačvańni ŭ padbuchtorvańni da paŭstańnia i rastracie.