Стала вядома, калі ў Беларусі будуць рабіць рэвакцынацыю пасля першага курса прышчэпак
Як заявіла першая намесніца міністра аховы здароўя Алена Богдан, тэмпы вакцынацыі ўзрастаюць.
21.10.2021 / 12:23
«У нас ёсць рэгіёны, якія набліжаюцца да 35 працэнтаў прышчэпленага насельніцтва — мы лічым ад агульнага насельніцтва, не выдзяляючы дзяцей. У нас ёсць і паліклінікі ў Мінску і рэгіёнах, якія прышчапілі ўжо больш за 50 працэнтаў насельніцтва старэйшага веку і тых, хто мае хранічныя захворванні. Гэта сёння наша галоўная задача», — сказала намеснік міністра.
Яна дадала, што ўчора міністр Дзмітрый Піневіч падпісаў загад аб змене падыходаў да рэвакцынацыі.
«Мы будзем яе рабіць праз 6 месяцаў — год пасля поўнага курса вакцынацыі. Усё будзе залежаць ад стану здароўя пацыента, наяўнасці або адсутнасці хранічных захворванняў», — сказала Алена Богдан.