Прысуд па справе анархістаў агучаць 22 снежня. Ім пагражае да 20 гадоў турмы
22 снежня (серада) у Мінскім абласным судзе агучаць прысуд анархістам Дзмітрыю Дубоўскаму, Ігару Аліневічу, Дзмітрыю Разановічу і Сяргею Раманаву. Прысуд вынясе суддзя Вячаслаў Тулейка ў адкрытым рэжыме, хоць увесь суд праходзіў у закрытым.
15.12.2021 / 21:03
Вядома, што амаль ніхто з абвінавачаных не браў удзел у судовым разглядзе, калі амаль ад пачатку працэс зрабілі закрытым, паведамляюць праваабаронцы.
Анархісты Ігар Аліневіч, Дзмітрый Дубоўскі, Дзмітрый Разановіч і Сяргей Раманаў былі затрыманыя ў ноч з 28 на 29 кастрычніка мінулага года недалёка ад беларуска-ўкраінскай мяжы.
Іх вінавацяць па шэрагу крымінальных артыкулаў за падпал службовых аўтамабіляў, будынка ДАІ і Дзяржаўнага камітэта экспертыз у Гомельскай вобласці:
— ч. 2 арт. 289 — акт тэрарызму;
— ч. 2 і ч. 4 арт. 295 — незаконныя дзеянні ў дачыненні да агнястрэльнай зброі, боепрыпасаў і выбуховых рэчываў;
А Дубоўскага і Аліневіча таксама і па. 1 арт. 333-1 — незаконнае перамяшчэнне праз мяжу забароненых рэчываў, агнястрэльнай зброі і выбуховых прыладаў.
Больш за год анархісты ўтрымліваюцца ў СІЗА КДБ, ім пагражае да 20 гадоў зняволення.